DILI, 01 Juñu 2026 (TATOLI)–Xefe Estadu-Maior Konjuntu Forsa Armada Brazil, Almirante Eskuadra Renato Rodrigues de Aguiar Freire, tuir kompeténsia ne’ebé nia iha, deside kondekora Ministru Defeza, Kontra Almirante Donaciano do Rosário Gomes ‘Pedro Klamar Fuik’, ho Medalla Méritu Estadu-Maior Konjuntu Forsa Armada sira.
Serimónia ne’e akontese hafoin Embaixadór Brazil ba Timor-Leste, Recardo Real hasoru malu ho nia omólogu Kontra Almirante Donaciano do Rosário iha edifísiu Ministériu Defeza, Fatuhada, Segunda ne’e.
Medalla Méritu Estadu-Maior Konjuntu Forsa Armada ne’e estabelese liuhusi Dekretu nú. 8.554, loron 06 Novembru 2015 no regula liuhusi Portária Ministériu Defeza Brazil nú.5.424, loron 27 Outubru 2022.
Notísia relevante : Selebra Loron Internasionál Feto, presiza mellora no promove feto iha PNTL
Medalla ida-ne’e destina atu fó agradesimentu ba militár no sivíl sira, Brazil no estranjeiru, organizasaun militár sira no instituisaun sivíl nasionál sira ne’ebé fó ona serbisu relevante ba Estadu-Maiór Konjuntu Forsa Armada Brazil nian.
“Ami konvida Sua Eselénsia Ministru Defeza Timor-Leste atu foti fatin ne’ebé prepara ona ba realizasaun entrega komenda ne’e. Ami mós konvida Sua Eselénsia Embaixadór Brazil ba Repúblika Demokrátika Timor-Leste, Ricardo José Lustosa Leal, no Sua Eselénsia Jenerál Ezérsitu Alceu Alves Almeida Costa atu entrega medalla ne’e,” Adidu Defeza Brazil ba Timor-Leste, Koronel Vitor Hugo Bergamachi hato’o iha Salaun Bilaterál Ministériu Defeza, Fatuhada.
Hafoin Serimónia kondekorasaun, Ministru Defeza, Kontra Almirante Donaciano do Rosário, agradese ba inisiativa.
“Simu ida-ne’e ho umildade, konsiente ho signifika ba omenajen ida-ne’e nu’udar konfiansa. Medalla ida-ne’e nu’udar rekoñesimentu pesoál ba ha’u, ne’ebé reprezenta valór dever, disiplina no kompromisu institusionál. Medalla ne’e nu’udar símbolu ba lasu amizade no respeitu kooperasaun entre povu rai rua no ba ita-nia institusaun,” nia akresenta.
Pedro Klamar Fuik dehan, atribuisaun medalla ne’e hanesan mós relasaun entre nasaun rua ne’ebé la’o iha tempu naruk nia laran no la’o hamutuk ho responsabilidade, oferese orientasaun no kontribuisaun ba misaun ida-ne’ebé komprimenta ba objetivu komún.
“Ho ida-ne’e ha’u manifesta ha’u-nia gratidaun. Ha’u simu onra ida-ne’e ho fuan no rekoñesimentu ida-ne’e nu’udar responsabilidade dobru. Mellada ida-ne’e ba ha’u la’ós nu’udar pontu ida-ne’ebé to’o iha ne’e, maibé nu’udar permanente ida-ne’ebé istimula hodi kontinua serví ho legalidade ho sentidu dever hametin liután pás iha kooperasaun entre rai rua,” nia tenik.
Ministru Defeza, Kontra Almirante Donaciano do Rosário da Costa Gomes ‘Pedro Klamar Fuik’ hato’o agradesimentu ba Brazil, ba atribuisaun medalla ne’e.
“Ida-ne’e sei demostra liu relasaun institusionál rai rua. Ba ha’u, ida-ne’e orgullu boot tanba Governu Brazil bele rekoñese institusaun ida no nu’udar mutuál respeitu ida-ne’ebé haree liu ba valór serbisu hodi kumpre ba onra sira. Obrigadu ba Señor Jenerál no ba entidade hotu ne’ebé iha ne’e,” nia subliña.
Jornalista : Natalino Costa
Editora : Julia Chatarina
