DILI, 30 janeiru 2024 (TATOLI)—Deputada hosi bankada Partidu Demokrátiku (PD), Sanchia Tilman, sujere ba Ministériu Solidariedade Sosiál no Inkluzaun (MSSI) atu hadi’a mekanizmu halo pagamentu ba idózu no invalidéz sira iha territóriu nasionál.
Notísia Relevante: Governu halo ona pagamentu pensaun sosiál ba idozu-invalidéz 90.552
“Hanesan reprezentante povu sujere ba Ministériu Solidariedade Sosiál no Inkluzaun (MSSI) no Ministériu Finansa atu bele buka mekanizmu pagamentu direitu ba maluk idózu sira-nia.. Se bele karik, halo pagamentu ne’e kada fula-fulan ou se la bele, bele buka mós meiu atu prosesu sira-nia pagamentu ba direitu idózu ne’e kada fulan tolu dala ida. Signifika iha tinan ida, sira bele simu dala-haat hodi sira bele sustenta sira-nia nesesidade loro-loron,” Deputada PD ne’e hato’o liuhosi intervensaun iha reuniaun plenária PN, tersa ne’e.
Tanba, tuir membru hosi órgaun lejislativa ne’e katak, iha kontaktu eleitorál ne’ebé hala’o iha baze idózu sira aprezenta sira-nia preokupasaun, nune’e sujere atu hadi’a mekanizmu pagamentu ne’e.
“Iha semana kotuk, bainhira halo vizita maluk sira iha munisípiu Manufahi, postu administrativu Same no mós munisípiu sira seluk hanesan Aileu, Covalima no Maliana, ha’u hasoru maluk idózu sira no sira hato’o sira-nia preokupasaun kona-ba pagamentu idózu nian ne’ebé durante ne’e sira simu kada fulan neen ka tinan ida dalarua. Sira mós aprezenta katak, sira-nia nesesidade hanesan mós ho ita sira seluk, hodi nune’e sira husu atu sira-nia direitu ba osan idózu ne’e atu bele simu fula-fulan hodi sustenta sira-nia nesesidade loro-loron,” nia dehan.
Aleinde ne’e, iha parte seluk komunidade mós hato’o katak sira-nia direitu ba idózu simu hanesan baibain kada simu fulan neen ba tinan ida dala-rua mak ba maluk idózu sira-ne’ebé mate fulan ne’e mak sira sei lakon sira-nia direitu ba pagamentu idózu ne’e.
“Agora, ita atu tama ba prosesu pagamentu ba direitu idózu sira-nian, ita hatene katak iha fulan ida-ne’e inísiu implementasaun ba planu orsamentu ne’ebé konsta iha Orsamentu Jerál Estadu (OJE) 2024 nian ne’ebé ita aprova iha tinan liu ba, nune’e oinsá sujere atu hadi’a mekanzimu pagamentu ba idózu sira,” nia hateten.
Enkuantu iha reuniaun plenária, Vise Ministru ba asuntu Parlamentár, Adérito Hugo da Costa, rejista preokupasaun Deputadu nian no sei enkamiña ba ministériu tutela.
Jornalista : Nelson de Sousa
Editór : Cancio Ximenes
