DILI, 01 Juñu 2026 (TATOLI) – Bankada Partidu Libertasaun Populár (PLP) manifesta preokupasaun kona-ba projetu konstrusaun Sentru Konvensaun Internasionál (ICC, sigla inglés), ne’ebé Governu halo ona lansamentu fatuk dahuluk iha 20 Maiu 2026, maibé seidauk iha alokasaun orsamentu ba obra ida-ne’e.
Deputadu Maria Angelina Sarmento kestiona ho projetu CCI durante diskusan Orsamentu Retifikativu iha faze espesialidade, tanba Ministériu Obra Públika (MOP) no Fundu Infraestrutura (FI) nia verba hetan korte millaun $60.
“Ha’u hakarak hatene projetu sira ne’ebé agora realiza iha Dili laran, liuliu konstrusaun Sentru Konvesaun Internasionál, ne’ebé Governu halo ona lansamentu ne’e iha ka la’e orsamentu 2026 atu halo konstrusaun? Tanba halo ona lansamentu maibé laiha previzaun osan ba ida-ne’e”, Angelina Sarmento hato’o preokupasaun ne’e iha diskusaun Orsamentu Retifikativu iha sesaun espesialidade iha Parlamentu Nasionál, ohin.
Nia mós lamenta katak Timor-Leste prepara-an atu asume Prezidénsia ASEAN iha 2029 no planeia harii sentru ida-ne’e, enkuantu falta verba ba konstrusaun referida.
Hatán ba preokupasaun ne’e, Ministru Koordenadór Asuntu Ekonómiku, Francisco Kalbuadi Lay, hateten projetu ida-ne’e interese nasionál, rejionál no internasionál.
“Dimensaun projetu ne’e pasadu, prezente nomós futuru iha sosiukulturál no ekonómiku. Atu esklarese detallu ba ida-ne’e ha’u nu’udar Ministru Koordenadór Asuntu Ekonómiku, prontu haree tempu própriu ho ekipa tomak mai esplika iha uma fukun ida-ne’e, iha tempu tuirmai”, nia hateten.
Antes ne’e, Kalbuadi Lay esplika kona-ba alokasaun Orsamentu Jerál Estadu (OJE) 2026 ba iha subprograma investimentu, diversifikasaun ekonómika, neʼebé prevee millaun $5 hodi halo preparasaun estudu ba projetu kontrusaun sentru konvensaun internasionál ne’ebé sei harii iha Portu Dili.
“Orsamentu alokasaun millaun $5 ne’e ba preparasaun estudu, tanba antes ne’e mós ita lansa tiha ona dezeñu no momentu ne’ebá mós partisipa husi Governu Malázia no Timor-Leste nian. Ne’ebé, ita sei harii sentru kovensaun internasionál ida iha Timór”, nia dehan foin lalais ne’e.
Iha sorin seluk, Ministru Planeamentu no Investimentu Estratéjiku, Gastão de Sousa, esklarese kona-ba korte Fundu Infraestrutura ne’ebé hetan millaun $60 ne’e, montante ida-ne’e la’ós de’it ba MOP, maibé inklui mós ba Fundu Infraestrutura hotu.
Nia esplika katak husi millaun $60 ne’e ba MOP rasik ko’a millaun $23.330. “Depoizde ko’a tiha millaun $23,330, MOP sei iha millaun $81, bele halo jestaun interna hodi ezekuta ba projetu sira ne’ebé daudaun la’o hela”, dehan.
Jornalista: Arminda Fonseca
Editora: Maria Auxiliadora
