Estudante finalista rihun 2-resin iha Kovalima sei tuir ezame nasionál
KOVALIMA, 05 Outubru 2026 (TATOLI)- Estudante finalista hamutuk 2.413 kompostu husi ensiñu báziku, sekundáriu jerál públika, sekundáriu tékniku vokasionál no sekundáriu katólika Ave Maria maka sei tuir ezame nasionál tinan letivu 2026 ne’ebé maka sei realiza iha loron 19 fulan-Outubru 2026.
Xefe Departamentu Parke Eskolár munisípiu Kovalima, Beneditos Asa relata, ekipa submete ona lista naran estudante finalista hirak ne’e ba iha Ministériu Edukasaun depois rekolla dadus no mós avaliasaun ba rejultadu ezame trimestre dahuluk no daruak nian iha tinan 2026.
“Etapa dahuluk, ami rekolla greilla avaliasaun trimestre dahuluk no submete rezultadu ba Diresaun Nasionál Ministériu Edukasaun, parte kuríkulu iha fulan Juñu, no iha etapa daruak, ami rekolla dadus bazeia ba rezultadu ezame trimestre daruak iha fulan Agostu no agora prosesu ne’e remata ona,”Nia hateten ba jornalista sira iha edifísiu Edukasaun Kovalima Santa Rosa.
Iha fatin seluk, Koordenadór Eskola Paralela Salele, Daniel Cardoso informa, eskola Sekundária Jerál Filial Salele ho totál estudante finalista hamutuk 120 maka daudaun ne’e preparadu atu tuir ezame nasionál iha tinan ida ne’e.
Husi númeru estudante finalista na’in 120 sei koloka ba iha sala hamutuk ualu, hosi siénsia teknólojia sei utiliza sala hamutuk lima no Siénsia Sosiál no Umanitária okupa sala tolu.
“Kona-ba preparasaun agora prontu ona no ami tama ona etapa ikus prepara pontu ba ezame lokál, ba seguransa no vijilánsia durante ezame, eskola prepara profesór vijilante hamutuk 16, ho profesór nain rua ba kada sala,” nia hateten.
Kona-ba fasilidade, nia dehan eskola ne’e hetan ona apoiu kadeira no meja hamutuk 60 husi Ministériu Edukasaun nune’e sei koloka ba sala tolu., enkuantu ba sala sira seluk, eskola sei uza nafatin fasilidade ne’ebé anteriór hodi fasilita prosesu ezame nasionál ne’e.
Munisípiu Covalima estabelese sentru ezame nasionál hamutuk 34 hodi akumula estudante finalista 2.413, kompostu husi feto 1.259 no mane 1.154. Tuir dadus distribuisaun sentru ezame nasionál ba eskola sekundária jerál no eskola sekundária Katólika hamutuk 7 ho estudante 966, kompostu husi feto 545 no mane 421.
No eskola sekundária tékniku vokasionál iha sentru ezame hamutuk tolu ho estudante 151, kompostu husi feto 80 no mane 71. Ensinu báziku iha sentru ezame hamutuk 24, ho estudante 1.296 kompostu husi feto 634 no mane 662.
Jornalista: Celestina Teles
Editór: Florencio Miranda Ximenes
