UDMTL husu MSSI fó apoiu finanseiru ba formasaun letra braille
DILI, 05 Outubru 2026 (TATOLI) – Vise-Diretór no Jestór Programa Uniaun Defisiénsia Matan Timor-Leste (UDMTL), Arcanjo Soares Martins, husu Ministériu Sosial, Solidariedade no Inkluzaun (MSSI) atu fó apoiu finanseiru ba programa formasaun lee no hakerek liuhusi sistema Braille.
Arcanjo hateten katak apoiu finanseiru husi MSSI importante atu fasilita kapasitasaun ba membru UDMTL, tanba organizasaun ne’e iha planu atu fó formasaun kona-ba sistema Braille, maibé hasoru limitasaun iha fasilidade no ekipamentu.
“Lori membru UDMTL husu ba MSSI atu suporta finanseiru hodi fasilita kapasitasaun edukasaun naun-formál, tanba dadaun ne’e UDMTL hakarak kapasita membru sira liuhusi treinamentu oinsá bele lee no hakerek. Maibé, ami seidauk iha fasilidade hanesan makina ba letra Braille,” Arcanjo hateten ba TATOLI iha nia serbisu fatin, Becora, ohin.
Nia hateten katak, atualmente, UDMTL akumula no apoia membru na’in-25 iha dormitóriu organizasaun ne’e iha Becora, ho objetivu atu fó treinamentu kona-ba maneira lee no hakerek liuhusi sistema Braille no formasaun seluk.
“UDMTL agradese ba MSSI tanba fasilita edifísiu ida ho dormitóriu ida iha Becora, ne’ebé ami uza ba atividade servisu,” nia hateten.
Nia dehan MSSI mós fó apoiu ai-han, hanesan foos 25 kilogramas hamutuk karón 10 kada fulan, atu suporta nesesidade ai-han UDMTL.
“Apoiu ne’e diak ona, maibé ami nafatin husu MSSI atu fasilita apoiu finanseiru atu suporta atividade edukasaun naun-formál,” nia salienta.
Arcanjo subliña katak apoiu finanseiru ne’e sei ajuda UDMTL kontinua dezenvolve kapasidade membru sira, liuliu ema ho defisiénsia matan, hodi sira bele hetan oportunidade aprendizajen no dezenvolve abilidade lee no hakerek.
Jornalista: Camilio de Sousa
Editór: Filomeno Martins
