Rezultadu teste laboratóriu: Tua ‘Moke no Habok’ afeta ba saúde, Labele konsumu!
OEKUSI, 16 Setembru 2026 (TATOLI) – Autoridade Inspesaun no Fiskalizasaun Atividade Ekonómiku Sanitária no Alimentár Institutu Públiku, (AIFAESA,I.P), Inspetora Jerál AIFAESA, Odete Viegas da Silva, apela ba ema hotu, liliu Rejiaun Administrativa Espesiál Oekusi Ambeno (RAEOA) atu labele konsumu tua ho marka Moke no Habok, tanba bele afeta ba saúde.
“Ita-nia iha Oekusi populasaun konsumu buras loos iha atividade sosiál iha Oekusi. Atu fó hanoin de’it katak, foin daudaun AIFAESA foti ona amostra ba tua ne’e rasik, tua Moke ho tua Habok, nia rezultadu teste laboratóriu hatudu ona katak labele konsumu, tanba tua sira-ne’e fó risku ba saúde públika bele hamosu moras oioin liliu moras la hada’et sira,” nia hateten hafoin relata progresu servisu ba Prezidente RAEOA, ohin.
Notísia relevante:Timor-Leste Realiza Primeiru Kampaña Sensibilizasaun Alkoolizmu
Tuir nia, rezultadu ne’e, parte AIFAESA relata ona ba Vise Primeiru-Ministru, hodi hein orientasaun maibé adianta daudaun ona katak, husu ba populasaun sira liliu jovén sira, labele ona konsumu tanba afeta saúde, “Tanba ne’e servisu ilegál sira presiza kontrolu”.
Inspetora jerál ne’e informa, AIFAESA simu ona polítika Autoridade RAEOA katak, atividade bazar fronteira iha Oekusi hahú loke ona iha sub-rejiaun Oésilo, nu’udar oportunidade di’ak ba ekipa konjunta atu halo observasaun no fiskalizasaun ba produtu importasaun no esportasaun.
“Ekipa konjunta ne’e, komposta husi AIFAESA, saúde, MCI, SERVE,I.P no parte relevante sira seluk, sei koopera servisu hamutuk atu observa no ai-han sira-ne’ebé tama sai liuhusi fronteira hanesan karatena, nune’e ita bele prevene la’ós totálmente maibé redús ona movimentu sira hanesan ne’e, atu sidadaun sira iha koñsimentu katak, sasán ne’ebé tama sai kumpre duni regra Governu bandu ona,” nia afirma.
Notísia relevante:Konsumidór Alkol Iha Timor-Leste Hamutuk 43%
Prezidente Autoridade RAEOA, Régio da Cruz Salu, hateten, konsidera misaun AIFAESA nia intervansaun iha Oekusi, importante hodi garante ijiene ba ai-han ne’ebé importadu.
“Prezensa AIFAESA iha Oekusi tenkisér, tanba Oekusi nu’udar rai enklave hale’u ho fronteira nasaun viziñu, entaun presiza kontrolu ba ai-han tama no sai, nune’e ema hotu bele prevene an husi moras sira,” nia hateten.
Jornalista: Abílio Elo Nini
Editór: Rafael Ximenes de A. Belo
