Seidauk konklui verifikasaun dokumentu husi aplikante 8.084 ba vaga Unidade Pediatria HNGV
DILI, 28 Setembru 2026 (TATOLI)—Diretór Servisu Apoiu Diagnóstiku no Terapéutiku Hospital Nacional Guido Valadares (HNGV), Vidal de Jesus, hateten Komisaun Rekrutamentu seidauk konklui avaliasaun ba dokumentu aplikante 8.084 kona-ba vaga rekrutamentu profisionál saúde hamutuk 478 tanba aplikante sira barak liu nune’e sei prolonga tan ba semana ida.
“Kona-ba vaga ne’ebé maka foin daudaun Hospital Nacionál Guido Valadares loke iha semana hirak ba kotuk, to’o agora Komisaun Rekrutamentu seidauk halo avaliasaun hotu ba dokumentu sira tanba númeru aplikante maka barak liu,” Vidal de Jesus dehan ba jornalista sira iha HNGV, Segunda ne’e.
Nia afirma ohin ba semana segunda kontinua halo selesaun ba dokumentu, tan ne’e espera katak iha semana ida-ne’e bele konklui ona.
Antes ne’e, Diretór Servisu Apoiu Diagnóstiku no Terapeutiku HNGV, Vidal de Jesus, hateten aplikasaun vaga ba faze dahuluk hahú iha loron 07-18 Setembru 2026, ema hamutuk 8.084 maka aplika.
“Kona-ba vaga HNGV ne’ebé submete dokumentu husi loron 07-18 Setembru ho totál aplikante 8.084, maibé vaga ita presiza hamutuk 478 de’it,” diretór ne’e tenik.
Nia esplika selesaun dokumentu hala’o iha Komisaun Funsaun Públika (KFP) hamutuk ho ekipa juri hodi asegura transparénsia no prevene familiarizmu.
“Prosesu selesaun dokumentu hotu, balun dokumentu la kompletu bele elemina, hanesan la asina ka dokumentu la orijinál, ne’e kritériu ne’ebé sei elimina. Sira ne’ebé liu selesaun dokumentu maka sei bá teste eskrita iha KFP,” nia subliña.
Vidal realsa laiha familiarizmu iha prosesu sira hotu-hotu, tanba sei la’o tuir prosedimentu normál.
Iha loron 07 Setembru 2026, HNGV anunsia vaga 478 kompostu husi Médiku Jerál Júnior 112, Enfermajen Jerál Júnior 236 no seluk tan atu servisu iha Unidade Pediatria foun no kritéria ne’ebé ospitál fó maka Médiku Verde, Enfermajen Azúl, Parteira Mean, TDTSP Kinur, Asistente Enfermajen Laranja, Asistente TDTSP koor-kafé (kastaña).
Jornalista: Felicidade Ximenes
Editór: Xisto Freitas da Piedade
