PM Xanana vizita Tailándia no delega Sérgio Hornai asume primeiru-ministru interinu
DILI, 04 Outubru 2026 (TATOLI) – Primeiru Ministru (PM), Kay Rala Xanana Gusmão, ohin dezloka ba Tailándia no delega Sérgio de Jesus Fernandes da Costa Hornai atuál Ministru Justisa asume primeiru-ministru interinu hahú husi loron 04 to’o 11 Outubru.
Xefe Governu hala’o vizita ofisiál bá Tailándia durante semana-ida, hodi hametin kooperasaun bilaterál no dezenvolve parseria estratéjika entre Timor-Leste ho Tailándia.
Durante vizita ne’e, Xefe Governu sei hala’o enkontru bilaterál ho Primeiru-Ministru Tailándia, Anutin Charnvirakul, atu ko’alia kona-bá asuntu sira ne’ebé iha interese komún bá nasaun rua.
Nune’e mós, PM Xanana Gusmão sei asiste serimónia asinatura akordu kooperasaun entre Timor-Leste ho Tailándia iha área estratéjika sira.
Hafoin serimónia ne’e, Primeiru-Ministru Tailándia sei oferese almosu ofisiál bá Xefe Governu ho delegasaun.
Aleinde enkontru bilaterál, PM Xanana Gusmão sei partisipa mós iha konferénsia kona-bá Fundu Petrolíferu, ne’ebé sei hala’o durante loron-rua, iha 6 no 7 Outubru, iha JW Marriott Hotel, Bangkok.
Konferénsia ne’e sei marka prezensa Ministru Finansas Tailándia, Governadór no membru sira hosi konsellu administrasaun.
Iha programa vizita nian, Xefe Governu sei hala’o mós vizita bá sidade Nonthaburi, ne’ebé hanesan kapitál Provínsia Nonthaburi no konsidera nu’udár sidade boot daruak iha Tailándia. Hafoin ne’e, PM Xanana sei vizita Thailand Environment Institute (TEI).
Durante vizita ofisiál ne’e, PM Xanana Gusmão sei hala’o enkontru mós ho reprezentante seitór privadu, inklui grupu Thai Beverage Public Company Limited, hodi buka oportunidade atu hametin kooperasaun ekonómika no investimentu entre nasaun rua.
Delega Sérgio Hornai asume Primeiru-Ministru Internu
Delegasaun Xefe Governu nian ba Ministru Justisa liuhusi despaxu Nú 170/PM-GPM/IX/2026, iha loron 30 Setembru 2026.
“Ho ida-ne’e ha’u informa ba Ita-boot katak ha’u sei auzente hosi nasaun entre loron 04 no loron 11 fulan-Outubru tinan 2026, hodi halo vizita ofisiál ida ba Tailándia tuir konvite hosi ha’u nia omólogu Tailándia. Durante ha’u-nia auzénsia, Ministru Justisa, Sr. Sérgio Hornai, sei asume koordenasaun Governu nian,” refere karta delegasaun ne’e ba Prezidente Repúblika José Ramos-Horta no fó mós koñesimentu ba Prezidente Parlamentu Nasionál, Deputada Maria Fernanda Lay no membru Governu hotu-hotu.
Primeiru Ministru Interinu atuál Ministru Justisa, Sérgio Hornai, esklarese katak funsionamentu kona-ba IX Governu ninia funsionamentu tenke la’o ba oin iha servisu ezekutivu ninian.
Delegasaun ne’e bazeia ba estrutura ka kompozisaun IX Governu nian tanba Vise Primeiru Ministru sira, Ministru Defeza, Ministru Negósiu Estranjeiru no Kooperasaun no Ministra Finansa laiha fatin, entaun Ministru Justisa tenke asume primeiru ministru interinu.
“Ohin, Primeiru-Ministru indizita ha’u hanesan primeiru-ministru interinu, ne’ebé laiha inkompatibilidade, laiha interese buat ruma, apenas atu koordena, asegura no funsiona governu ida-ne’e bele la’o di’ak hahú husi loron 04 to’o 11 Outubru,” Primeiru-ministru interinu informa ba Ajénsia TATOLI, iha Dili, domingu ne’e.
Durante auziénsia Primeiru-Ministru nian, Primeiru-Ministru interinu ezerse funsaun hotu-hotu ho koordenasaun ho Gabinete Primeiru Ministru no Primeiru Ministru rasik.
“Kuandu iha asuntu sira-ne’ebé liga servisu sira-ne’ebé mais importante, estratéjiku liga ba interese ezekutivu ninian, interese órgaun soberania estadu nian, koordenasaun iha servisu instituisaun estadu ninian. Ba servisu saida de’it mak bele halo mas sempre iha koordenasaun ho Primeiru-Ministru, hamutuk ho instituisaun relevante sira seluk atu haree asuntu sira iha Konsellu Ministru liuhusi órgaun kolejiál ne’e, ne’ebé ke hetan orientasaun husi Primeiru Ministru,” Ministru Sérgio informa.
Nia dehan, Primeiru-Ministru interinu iha lejitimidade dijije reuniaun kolejiál Konsellu Ministru nian tanba delegasaun mai husi Primeiru-Ministru, fó koñesimentu ba Prezidente Repúblika, José Ramos-Horta.
TATOLI
