KHUNTO husu Governu hakbesik servisu resenseamentu eleitorál bá área rurál
DILI, 05 Outubru 2026 (TATOLI) – Deputadu husi Bankada Kmanek Haburas Unidade Nasionál Timoroan (KHUNTO), António Verdial de Sousa, husu ba Governu atu hakbesik serbisu atendimentu resenseamentu eleitorál no eleitór foun ba sidadaun sira to’o área rurál hodi partisipa másima iha Eleisaun Prezidensiál iha 2027.
Tuir fiskalizasaun iha baze, nia simu preokupasaun husi populasaun atu trata dokumentu referidu ho distánsia dook. Tanba ne’e, nesesita atensaun Governu hodi fasilita liután sidadaun sira ne’ebé iha direitu votu bele hetan kartaun biométriku liuhusi dalan ne’ebé prátiku luan no lais liu.
“Nu’udar reprezentante povu, hakarak levanta preokupasaun povu barak nian, liuliu iha área remota presiza hetan atensaun”, nia hato’o liuhusi reuniaun plenária Parlamentu Nasionál, ohin.
Hodi sujere desentraliza servisu movel, modernizasaun sistema teknolojia, hasai kustu no burokrásia, kampaña informasaun no edukasaun.
“Estabelese postu báziku, labele tau de’it sentru rejistu iha kapitál munisípiu, maibé to’o ba postu administrativu no suku sira”, nia dehan.
Nia sujere atu atendimentu brigada movel haruka ekipamentu bá to’o suku remota ne’ebé dook husi vila, no fó prioridade ba grupu vuneravel hanesan defisiente, ferik no katuas.
“Husu atu halo kampaña kona-ba informasaun no edukasaun ne’ebé tenke luan hodi fó sai informasaun kona-ba benefísiu husi kartaun nian no oráriu servisu movel nian”, nia salienta.
Ministériu Administrasaun Estatál (MAE), Komisaun Nasionál Eleisaun (CNE, sigla portugés), no Sekretariadu Tékniku no Administrasaun Eleitorál (STAE) presiza serbisu hamutuk ho autoridade to’o postu no suku iha territóriu.
Vise-Ministru ba Asuntu Parlamentár Adérito Hugo, rejista preokupasaun ne’e no sei enkamiña ba entidade tutela hodi tau atensaun.
Jornalista: Nelson de Sousa
Editora: Maria Auxiliadora
