Imprime ona Pontu Ezame Nasionál, agora tama faze einpakotamentu
DILI, 05 Outubru 2026 (TATOLI)–Ministériu Edukasaun prepara ona pontu ba realizasaun Ezame Nasionál ba finalista Klase 9.º Ensinu Báziku no 12.º Ensinu Sekundáriu Jerál no Vokasionál, ne’ebé sei hala’o iha loron 16-19 Outubru 2026.
Koordenadór Gabinete Kurríkulu Unidade Nasionál iha Ministériu Edukasaun (ME), João Maupelu, informa preparasaun ba ezame hahú ona hosi inísiu tinan, inklui halo diseminasaun bá eskola iha munisípiu hotu kona-ba realizasaun Ezame Nasionál, prepara pontu no elabora kestaun tuir kurríkulu.
“Pontu ezame ita elabora hotu tiha ona no impresaun mós hotu ona. Agora foin hahú einpakotamentu ba Ensinu Báziku,” koordenadór dehan iha ME, Vila Verde, Dili, Segunda ne’e.
Tuir nia katak pontu ezame prontu ona no dokumentu relevante sira mós imprime ona no agora sei tau iha envolope tuir disiplina, depoiz tau hamutuk iha kaixa tuir eskola. Kaixa hirak-ne’e sei haruka bá eskola sentru sira-ne’ebé sei realiza Ezame Nasionál.
Totál estudante finalista hosi ensinu báziku ne’ebé atu frekuenta iha Ezame Nasionál hamutuk 25.267. Enkuantu, Ensinu Sekundáriu Jerál hamutuk 22.101 no estudante sira ba área siénsia no teknolojia hamutuk 11.649. Estudante siénsia sosiál no umanidade hamutuk 10.452. Ba Ensinu Sekundáriu Tékniku Vokasionál hamutuk 3.489 no ba estudante ekivalénsia Ensinu Básiku hamutuk 332.
Koordenadór hateten katak prosesu einpakotamentu sei finaliza iha 15 Outubru, no iha loron ne’e munisípiu sira sei mai foti pontu ezame atu lori bá eskola sira, molok ezame hahú iha loron 16 to’o 19 Outubru.
Nia dehan matéria ba Ensinu Báziku iha Ezame Nasionál sei kobre Matemátika, Inglés, Portugés, Istória no Jeografia, Siénsia Fízika no Naturál no Tetun.
Enkuantu, ba Ensinu Sekundáriu Jerál, matéria ezame sei depende ba área estudu, inklui Matemátika, Inglés, Portugés, Kímika, Biolojia, Fízika, Tétun no matéria sira seluk tuir área.
Koordenadór mós esplika katak autoridade edukasaun prepara ona matadalan ba munisípiu no eskola kona-ba sistema vijilánsia iha sala ezame. Manorin sira sei organiza kruza vijilante atu asegura prosesu ezame la’o tuir prosedimentu.
Aleinde ne’e, ekipa hosi Ministériu Edukasaun, Inspesaun no entidade relevante sira sei fó apoiu no halo monitorizasaun iha sala ezame.
Estudante ho nesesidade espesiál hetan atendimentu
Koordenadór João Maupelu mós hateten, ba estudante sira ne’ebé iha kondisaun espesiál, hanesan moras, asidente, problema haree ka nesesidade espesiál seluk, sei prepara medida apropriada.
Ba estudante sira-ne’ebé presiza oportunidade seluk tanba razaun justifikada, pontu ezame mós preparadu rezerva atubele uza ba segunda via, tuir pedidu no dokumentasaun hosi instituisaun relevante. Nune’e mós, ba estudante ho defisiénsia haree, purezemplu, letra iha pontu ezame bele halo boot liután atu fasilita leitura. Estudante balu mós bele hetan akompañamentu espesiál, inklui apoiu ba leitura tuir nesesidade.
Jornalista: Osória Marques
Editór: Xisto Freitas da Piedade
