Negosiante Mini-Merkadu II Becora enfrenta falta bee moos no sentina públiku
DÍLI, 05 Outubru 2026 (TATOLI) – Negosiante sira iha Mini-Merkadu II Becora, Dili, enfrenta falta bee moos no sentina públiku, ne’ebé difikulta atividade komérsiu loroloron no bele aumenta risku ba higiene no saúde públiku.
Porta-voz negosiante Merkadu II Becora, David de Carvalho, hateten katak kuaze negosiante 200 resin ne’ebé fa’an sira iha merkadu ne’e enfrenta problema falta bee moos no sentina públiku.
“Ami ne’ebé fa’an iha Merkadu II Becora kuaze hamutuk na’in 200 resin enfrenta falta bee moos no laiha sentina públiku. Tanba ne’e, ami buka bee iha fatin Komarka Becora hodi uza ba nesesidade loroloron. Bainhira atu ba sentina, ami uza deit sentina komunidade ne’ebé besik merkadu,” David de Carvalho hateten ba TATOLI iha nia fatin fa’an, Merkadu II Becora, iha Segunda-feira ne’e.
Maibé, nia dehan katak falta bee moos no sentina públiku sai problema boot ba negosiante sira, liuliu iha esforsu atu asegura igiene no saúde públiku iha merkadu.
“Modo sira presiza bee atu rega. Se lae, modo sira namlaek. Ami mos presiza sentina públiku, maibé desde merkadu ne’e konstrui to’o agora laiha bee moos no laiha sentina públiku. Tanba ne’e, susar tebes atu garante igiene no saúde públiku ba ema tomak,” nia dehan.
Maski enfrenta kondisaun ne’e, David de Carvalho hateten katak negosiante sira kontinua fa’an sira-nia produtu atu hetan rendimentu hodi sustenta nesesidade família no selu edukasaun oan sira nian.
Nia hateten katak negosiante sira fa’an modo oioin, hanesan kangkung, mostarda, brinjela no ai-farina tahan, inklui produtu lokal seluk hanesan talas, fehuk, fore-mungu, fore-rai no produtu sira seluk.
“Rendimentu depende ba ema ne’ebé sosa. Ho rendimentu ne’e, ami bele sustenta nesesidade uma-laran no selu oan sira nia edukasaun,” nia dehan.
Tanba problema falta bee moos no sentina públiku, David de Carvalho husu ba Governu atu instala bee moos no konstrui sentina públiku iha Merkadu II Becora.
Mini-Merkadu II Becora konstrui iha 2018 ho objetivu atu fasilita negosiante sira fa’an modo no produtu lokal seluk, hodi sustenta ekonomia família no ajuda selu edukasaun oan sira nian.
Jornalista: Camilio de Sousa
Editór: Filomeno Martins
