ABCID – KI fasilita formasaun fundamentu jornalizmu ba jornalista na’in 14
DÍLI, 05 Outubru 2026 (TATOLI) – Australian Broadcasting Corporation International Development (ABCID), hamutuk ho Konsellu Imprensa Timor-Leste (KI-TL), fasilita formasaun fundamentu jornalizmu ba jornalista na’in-14 husi mídia oioin.
Jornalista sira ne’ebé partisipa iha formasaun ne’e mai husi Agência Notisioza Tatoli, GMN-TV, SMNews, STL Group, Iklik News, Timor Post, SAP News, Media Demokrásia, Rádio Komunidade Komoro, Rádio Turiskai no Rádio Loriku Lian.
Formasaun ne’e hala’o durante loron lima, hahú husi 05 to’o 09 Outubru 2026, ho objetivu atu hadi’a kapasidade no abilidade jornalista sira, hodi bele sai profisionál no produz notísia ho koñesimentu kle’an kona-ba área jornalizmu.
Formadór sira ne’ebé fasilita formasaun ne’e mak hanesan Fernanda Maria husi ABCID Austrália, Maria Bibel husi Konsellu Imprensa no Rita Almeida husi Agência Notisioza Tatoli.
Formadora ABCID, Fernanda Maria, hateten katak formasaun ne’e sei fó oportunidade ba jornalista sira atu aprende aspetu teóriku no prátiku kona-ba fundamentu jornalizmu.
“Iha formasaun ne’e sira sei aprende teória báziku kona-ba jornalizmu no aleinde ne’e sira mós sei iha sesaun prátika,” formadora ne’e esplika.
Nia subliña katak matéria sira ne’ebé aborda iha formasaun ne’e inklui abilidade fundamentál ba jornalizmu efetivu, reportajen inkluzivu, liuliu Alkansa, Reflete no Reprezenta (ARR), no mós halibur informasaun, halo reportajen no hakerek notísia ba plataforma oioin.
Maria husu partisipante sira atu konsentra ba matéria sira ne’ebé sei aprende, tanba koñesimentu ne’e iha relasaun ho papel mídia nian.
Formadora ne’e fiar katak liuhusi formasaun ne’e, jornalista sira sei hetan koñesimentu no esperiénsia foun ne’ebé bele aplika iha sira-nia servisu.
Iha oportunidade ne’e, partisipante husi GMN-TV, Marcos Sebastião, hato’o agradese ba inisiativa KI no ABCID tanba fó oportunidade ba nia atu aprende no aumenta nia abilidade iha área jornalizmu.
“Durante ne’e ami aprende barak liu kona-ba tékniku hanesan opera kámera, maibé kona-ba hakerek notísia nian ladún. Tanba ne’e mak ha’u presiza duni atu aprende hodi aumenta ha’u-nia koñesimentu,” jornalista ne’e subliña.
Nia hatutan katak atu sai jornalista profisionál, presiza aprende barak tanba informasaun iha tipu oioin, la’ós de’it hard news, maibé mós iha in-depth reporting, feature, reportajen investigativu, storytelling no seluk tan.
Jornalista: Alexandra da Costa
Editór: Filomeno Martins
