DILI, 27 maiu 2019 (TATOLI)-Klínika Bairru-Pité, Dili, fulan tolu (3) ona enfrenta hela krize finanseira, tanba ne’e, ohin, Diretór Klínika, Daniel Murphy, hasoru malu ho Prezidente Repúblika, Francisco Guterres Lú Olo, hodi partilla dezafiu ida ne’e ba Xefe Estadu.
Ho krize orsamentu ne’e, funsionáriu sira iha Klínika refere seidauk simu saláriu no periódika mós servisu medikamentu nian hodi fó tratamentu ba pasiente sira ne’ebé mak presiza hetan tulun.
“Durante fulan tolu ami arraska. Iha servisu barak hodi ajuda ema moras sira, maibé ami presiza tulun hosi governu,” informa Daniel Murphy ba Jornalista sira, hafoin hasoru malu ho Prezidente Repúblika iha Palásiu Prezidénsia, Bairru-Pite, Dili.
Daniel Murphy hateten, ho situasaun ida ne’e afeta ba pagamentu saláriu funsionáriu tenke atraza no mós falta ai-moruk hodi difikulta prosesu atendimentu ba pasiente 300-resin ne’ebé kada loron konsulta no tratamentu iha Klínika ne’ebá.
Mezmu pagamentu saláriu atraza, maibé profisionál saúde sira kontinua servisu hodi hala’o sira nia devér fó atendimentu ba pasiente sira.
Dirijente Klínika ne’e, relata ba xefe estadu kona-ba númeru moras Tubercoluse no HIV/SIDA maka identifika aumenta kada semana.
Nia dehan, Pasiente HIV/SIDA na’in 175 maka daudaun ne’e halo hela tratamentu iha Klínika Bairru-Pité. Maioria hosi pasiente sira ne’e kona moras da’et ne’e hodi relasaun sexual livre.
Atu prevene númeru HIV/SIDA iha rai laran, Klínika ne’e iha ona planu sei halo kampaña kona-ba prevensaun iha fronteira Covalima no Bobonaro iha tinan ida ne’e.
“TBC no agora HIV aumenta tan, tanba ne’e ami sei halo kampaña ba fronteira terrestre,” hateten Daniel Murphy
Iha okaziaun hanesan, Jestór Klínika Bairru-Pité, Inacio dos Santos esplika Prezidente Repúblika promete sei informa problema ne’e ba Primeiru-Ministru, Taur Matan Ruak, hodi buka solusaun.
Klínika Bairru-Pite, katak Inacio dos Santos, halo tramentu espesiál mós ba pasiente leukemia ka Kankru ran ne’ebé durante ne’e hetan apoiu orsamentu ba medikamentu hosi fundasaun max ho valor rihun $175 kada trimestral no mós apoiu hosi kompañia farmásia ida hosi Suzerlandia.
Durante ne’e, Klínika Bairru-Pité hetan mós orsamentu hosi ministériu saúde maibé apoiu ne’e tenke paradu durante fulan tolu ona tanba falta orsamentu.
Jornalista : Agapito dos Santos
Editór : Francisco Simões
