VIQUEQUE, 27 juñu 2024 (TATOLI)-Xefe suku Bahatata, postu administrativu Uatucarbau, munisípiu Viqueque, Patricío Maria Pinto, hateten, autoridade suku Bahatata hamutuk ho Programa Nasionál Dezenvolvimentu Suku (PNDS) halo identifikasaun ikus ba bee-matan hodi dada bee ba uma-kain 80 husi aldeia Neluai no aldeia Builakurae.
“Orsamentu PNDS husi tinan-2022 ba ami-nia suku Bahatata deside dada bee-moos hodi kanaliza ba komunidade aldeia rua ne’ebé durante tinan naruk sira enfrenta ba bee-moos. Tanba komunidade sira-ne’e bainhira tama ona ba tempu bailoron iha fulan-agustu komunidade sira tenke ba kuru bee iha mota hafoin komsumu. Tanba ne’e, ami tau prioridade ba bee-moos nune’e foin lalais loron tersa (25/06) ami hamutuk ho ekipa PNDS sira halo identifikasaun ikus ona ba bee-matan ne’ebé atu dada ba aldeia rua ne’e,” Patricío Maria Pinto, hateten ba Agência TATOLI, iha postu Viqueque Vila, ohin.
Líder komunitáriu ne’e hatutan, projetu kontrusaun sistema bee-moos ne’e sei kontrui tanke ida iha bee-matan ho medida 3.50×3.50 metru no tanke ba komunidade sira hamutuk 8 ho medida 4×4 metru. Projetu dada bee-moos ba aldeia rua referida sei gasta orsamentu hamutuk $.31 mil. Bee-matan referidu lokaliza iha área Alale Soribata, suku Haekoni, postu Baguia, munisípiu Baucau hodi liga ba aldeia rua kuaze klimetru ida-resin.
“Projetu ida-ne’e PNDS kontratu ho badaen lokál sira husi suku Bahatata no iha área Baguia badaen sira ne’ebá maka servisu kontrusaun tanke. Obra ne’e ho durasaun fulan tolu; hahú jullu sei ramata setembru 2024, maibé depende ba klima liuliu udan. Ami halo ona survey (peskiza) ikus no ami planu projetu ne’e sei implementa semana ohin kinta loron 4 fulan-jullu ne’e”, nia akresenta.
Nune’e autoridade lokál ne’e dehan, projetu kanalizasaun bee-moos referidu semana oin implementa autoridade sei esforsu hodi kontrola ba implementasaun atu projetu finaliza tuir kontratu, atu komunidade sira bele asesu ba bee-moos ne’ebé durante ne’e hasoru.
“Kona-ba implementasaun projetu ne’e ami sei esforsu tomak hodi tau matan tanba ami hakarak ne’e ami-nia komunidade sira asesu ba bee-moos. Ha’u mós koordena ona komunidade parte aldeia rua bainhira projetu ne’e ramata bee tama aldeia komunidade kada uma-kain ida kada fulan ida sei kontribui osan $0.25, atu aban-bain rua sasán ruma aat karik ita bele uza osan sira-ne’e hodi hadi’a fali”, nia hato’o.
Tuir dadus populasaun aldeia rua kompostu husi Builakurae no aldeia Neluai ho totál uma-kain 80 no totál populasaun na’in-400 ne’ebé sai benefisiáriu ba kanalizasaun bee-moos.
Jornalista : Vitorino Lopes da Costa
Editór : Florêncio Miranda Ximenes
