VIKEKE, 01 Jullu 2026 (TATOLI)–Diretór Ensinu Báziku Sentrál 01 Bai Meta, Postu Administrativu Vikeke Vila, Munisípiu Vikeke, Abílio da Costa Baptista, informa implementasaun Programa Merenda Eskolár (PME) falta menu susubeen ba estudante sira tanba iha Munisipiu Vikeke laiha karau susu-been.
“Kona-ba implementasaun programa merenda eskolár tinan ida-ne’e eskola mak implementa direta. Uluk Ekipa Jestasaun Programa Merenda Eskolár mak implementa, maibé ami mak jere rasik. Ne’ebé, iha implementasaun ne’e ita sei falta mak produtu karau susubeen. Menu sira seluk ita iha. Karau susu-been mak ita buka iha Vikeke la hetan. Matadalan PME la autoriza ita sosa susubeen fabrikadu. Nune’e, karau susu-been la’ós ami de’it mak laiha, eskola sira iha Vikeke mós laiha hotu,” Abílio da Costa Baptista ba TATOLI iha EBC 01 Bai Meta, Vikeke Vila, Kuarta ne’e.
Maski laiha karau susubeen, nia dehan, eskola kontinua implementa programa merenda eskolár ba estudante sira.
Abílio esplika menu ba PME fahe ba grupu tolu ne’ebé kompostu husi grupu ida mak ai-han haburas hanesan naan karau, ikan, manu, manu tolu, karau susubeen no fore, grupu proteina mak hanesan hudi tasak, sabraka, ai-dila no seluk tan, enkuantu grupu fó forsa kompostu husi batar, etu, talas no ai-farina.
“Menu sira-ne’e ami garante no maioria uza protudu lokál 75% no importadu 25%,” nia tenik.
Iha fatin hanesan, estudante EBC 01 Vikeke, Ivánio Soares Amaral, haktuir kada loron estudante sira konsome merenda eskolár no motiva tebes estudante sira estuda iha eskola.
“Iha ami-nia eskola loron-loron ami sempre han tuir oras eskola nian. Menu ne’ebé ami konsome mak etu, ai-fuan no naan. Ami sente kontente ho Programa Merenda Eskolár,” nia subliña.
Entretantu, estudante EBC 01 Vikeke ne’ebé sai benefisiáriu ba Programa Merenda Eskolár ho hamutuk na’in-341 kompostu husi primeiru síklu to’o terseiru síklu ne’ebé daudaun ne’e ativa iha prosesu aprendizajen.
Jornalista: Vitorino Lopes da Costa
Editór: Xisto Freitas da Piedade
