DILI, 07 agostu 2024 (TATOLI)—Reprezentante povu iha uma fukun Parlamentu Nasionál (PN) liuhusi Deputadu KHUNTO, António Verdial de Sousa, husu ezekutivu atu fó protesaun ba estudante timoroan ne’ebé iha Bangladesh, tanba país refere daudaun ne’e hasoru hela manifestasaun boot husi sidadaun sira hasoru sira-nia Governu.
“Mensajen husi Bangladesh husu atu tulun timoroan ne’ebé daudaun ne’e hasoru situasaun defísil tebe-tebes,” nia hato’o iha uma fukun Parlamentu Nasionál.
Vise Ministru ba asuntu Parlamentár, Adérito Hugo da Costa, hateten kona-ba timoroan sira iha Bangladesh no iha estudante lubun ida dezde primeiru akontesimentu iha semana rua liubá informasaun mai iha Governu liuhusi Ministériu Negósiu Estranjeiru no Kooperasaun (MNEK) koordena embaxada ne’ebé besik ba Bangladesh mak iha Myanmar.
Nune’e, nia dehan, diplomata timoroan sira iha ne’eba halo hela serbisu koordenasaun ho MNEK hodi akompaña situasaun.
“Primeiru akontesimentu estudante sira-nia hela fatin la afetadu no sekundu akontesimentu horisehik no hori bainrua afetadu. Ita liuhusi MNEK iha embiaxada Timor nian iha Myanmar ne’ebé besik liu halo hela koordenasaun iha posibilidade oinsá atu evakua ou observa situasaun,” nia hateten.
Nune’e, husu akompaña nafatin liuhusi MNEK, liuhusi misaun diplomátiku hodi bele proteje sidadaun timoroan.
“Ein-prinsípiu manifestasaun horisehik to’o horikalan kuandu Primeira-Ministra Bangladesh resigna-aan, agora Governu tranzisaun lidera husi militár ninian mak rekupera orden públika,” nia hateten
Jornalista : Nelson de Sousa
Editór : Cancio Ximenes
