DILI, 15 Juñu 2026 (TATOLI) – Primeiru-Ministru, Xanana Gusmão, hala’o viajen ofisiál, ohin, bá Rúsia hodi partisipa iha Summit ASEAN–Rusia 2026, ne’ebé sei realiza iha sidade Kazan durante loron tolu, hahú husi 17 to’o 19 Juñu 2026.
Iha enkontru ne’e, Xefe Governu sei hasoru malu ho líder sira husi nasaun membru Association of Southeast Asian Nations (ASEAN) no Prezidente Rúsia, Vladimir Putin, atu diskute no aprofunda relasaun amizade no kooperasaun entre ASEAN no Rúsia.
Summit ASEAN–Rúsia konsidera nu’udár plataforma importante atu hametin amizade, diálogu polítiku no kooperasaun ekonómika entre nasaun sira iha rejiaun Sudeste Ázia no Rúsia. Líder sira sei debate asuntu importante sira hanesan seguransa rejionál no globál, investimentu no komérsiu, enerjia, edukasaun, teknolojia, saúde públika, konektividade, infraestrutura no troka kultura.
“Objetivu prinsipál husi summit ne’e atu reforsa relasaun diplomátika entre ASEAN no Rúsia, promove kreximentu ekonómiku hamutuk no kontribui ba manutensaun pás no estabilidade iha rejiaun”, refere komunikadu husi Governu.
Ba Timor-Leste, ASEAN kontinua sai plataforma estratéjika atu promove dezenvolvimentu ekonómiku, aumenta kapasidade nasionál, hametin relasaun internasionál no asegura dezenvolvimentu sustentavel. Maski Timor-Leste kontinua integra-an iha atividade no diskusaun rejionál sira ASEAN nian hanesan uarte hosi prosesu adezaun totál.
Durante summit ne’e, sei realiza mós sesaun painél no meza redonda sira ne’ebé diskute parseria entre ASEAN no Eurasian Economic Union, inklui kriasaun espasu komérsiu no investimentu komún, kuidadu saúde, kooperasaun enerjia no indústria, dezenvolvimentu dijitál, Intelijénsia Artifisiál (AI), seguransa ai-han, no konektividade transporte no lojístika.
Integrasaun iha Eurasia sai mós tema importante iha fórum ne’e. Prosesu ne’e envolve esforsu nasaun sira iha Europa no Ázia atu hametin kooperasaun ekonómika, polítika, seguransa no infraestrutura.
Organizasaun sira hanesan Eurasian Economic Union, Shanghai Cooperation Organisation no Belt and Road Initiative konsidera nu’udar ezemplu importante husi integrasaun rejionál ne’ebé promove komérsiu, investimentu, konektividade no estabilidade.
Governu Timor-Leste haree esperiénsia integrasaun Eurasia nu’udar referénsia importante ba prosesu integrasaun rejionál iha ASEAN, liuliu atu reforsa kooperasaun ekonómika no dezenvolvimentu nasionál.
Jornalista: Arminda Fonseca
Editora: Maria Auxiliadora
