DILI, 08 agostu 2024 (TATOLI) – Ministru Negósiu Estranjeiru no Kooperasaun (MNEK), Bendito Freitas, hateten, forma ona ekipa hodi fó protesaun ba timoroan sira ne’ebé dadaun ne’e hasoru difikuldade iha Bangladesh.
“Ami iha ne’e, iha ona ekipa, ekipa mak atu haree hela servisu ne’ebé Ministériu Negósiu Estranjeiru no Kooperasaun atu halo, iha ekipa ne’ebé distribuidu ita haree rejiaun Áfrika nian, Europa ASEAN nian ne’ebé diresaun jerál ba asuntu ASEAN Ocean ne’e sei haree kona-ba ida-ne’e, haree oinsá bele proteje ita-nia maluk timoroan sira ne’e,” Ministru Bendito hateten ba jornalista sira iha edifísiu MNEK, kinta ne’e.
Iha Bangladesh no iha estudante lubun ida dezde primeiru akontesimentu iha semana rua liubá informasaun mai iha Governu liuhusi MNEK koordena embaxada ne’ebé besik ba Bangladesh mak iha Myanmar.
Tanba ne’e, diplomata timoroan sira iha ne’ebá halo hela serbisu koordenasaun ho MNEK hodi akompaña situasaun.
Manifestasaun boot, organiza husi estudante, inklui públiku, foin lalais ne’e, rezulta vítima mortal, inklui repartisaun públika balun hetan estragu no sunu, halo Primeira-ministra Bangladesh, Sheikh Hasina, rezigna-aan, no agora Governu tranzisaun lidera hosi militár ninian mak rekupera orden públika.
Ho kestaun ne’e halo deputadu sira iha uma-fukun Parlamentu Nasionál preokupa no husu Governu tenke halo atuasaun lalais hodi proteze timoroan hirak ne’e.
Notísia relevante:Reprezentante povu husu fó protesaun ba estudante timoroan iha Bangladesh
Jornalista: Hortencio Sanchez
Editór: Rafael Ximenes de A. Belo
