DILI, 14 Juñu 2026 (TATOLI)—Karketu Dili FC susesu halakon Coração FC ho golu mihis 1-0 iha jogu kontinuasaun Primeira Divizaun Liga Futeból Timor-Leste (LFTL) époka 2026 ne’ebé hala’o iha Domingu kalan iha Estádiu Munisipál Dili.
Bainhira apitu hahú lian, ekipa rua hatudu ambisaun atu foti pontu tolu (3). Coração FC ho treinadór Miro Baldo Bento komesa ho formasaun 4-4-2 no fó presaun ba Karketu Dili FC nia defeza. Atakante Jeka Monterio ho Gfri Haitupo kria okaziaun dahuluk iha minutu 8 no 15, maibé Egídio de Oliveira iha guarda -rede salva ho espetakulár.
Iha parte seluk, Karketu Dili FC la joga defensivu de’it. Daniel Kono ho Angeniku Viegas utiliza kontra joga matenek hodi ameasa Coração. Minutu 22, Angenuku Viegas lansa xutu ne’ebé nia simu husi Zenivio Mota husi li’ur área penalidade, bola la kona iha alvu. Minutu 30, kombinasaun Mumin Mohammed ho Alexandre Lemos fó kruzamentu perigu ba área, maibé Georgino da Silva konsege baku sai.
Intensidade jogu sa’e bainhira árbitru Francisco Pereira fó kartaun amarelu ba Egidimo Almeida husi Coração FC iha minutu 15 tanba falta maka’as. Ho ritmu jogu ne’ebé la’o maka’as to’o jogu entervallu rezultadu 0-0 mantein maski jogadór parte rua kria kontra-atake barak.
Hahú segunda parte, treinadór rua halo mudansa ba jigadór. Karketu Dili hasai Gaudêncio Nontiro iha minutu 45 no jogu muda ritmu. Minutu 33 liu tiha deskansu, momentu desizivu mosu. Daniel Kono simu bola husu Angenuku Viegas bainhira nia hala’o jogu indivíduu hodi finta defeza Coração nian rua, bola liubá Daniel Kono no fura liña defeza Coração nian ho dribling, tama bá área no xutu kruzadu ne’ebé liu Georgino da Silva nia liman leet. 1-0 ba Karketu Dili halo Estádiu nakdoko.
Hafoin golu, Coração FC fó resposta imediatu. Treinadór Miro Baldo Bento hatama jogadór foun haat (4) iha minutu 50, 60, no 78 hodi aumenta presaun. Jeka Monterio ho Marinho da Costa hetan espasu ba xuta minutu 55 no 68, maibé Egidio de Oliveira konsistente salva hotu bola hirak-ne’e. Karketu joga ho pasiénsia no hein de’it momentu atu kontra-atake.
Maski Coração lansa atake maka’as maibé la rezulta golu hodi halo impata jogu ne’e. To’o apitu ikus lian jogu termina.
Vitória 1-0 ne’e fó Karketu rekolla ona pontu neen (6), rezultadu husi manán jogu dala-rua. Treinadór Bernardo Teye nia estratéjia defende no kontrajoga funsiona perfeitu. Iha parte seluk, Coração FC presiza hadi’a sira-nia finalizasaun bainhira kria ona okaziaun barak maibé la konsege golu.
Skuad Coração
Treinadór: Miro Baldo Bento
(31) Georgino da silva, (5) Januario Pinto, (4) Rosalino de Jesus, (13) Egidimo Almeida, (2) Bryhannus Muaraiay, (10) Denilson Almeida, (29) Adaljo Soares, (6) Jose Pinto, (20) Yohanes Ibrahim, (69) Jeka Monterio, (99) Gfri Haitupo.
Suplente
(26) Jose Sama, (17) Estevão de Almeida, (22) Jose Pereira, (9) Pascoal Fernandes, (7) António Martins, (27) Azevedo Gama, (8) Paulo Bráz, (21) Marinho da Costa, (23) Expedito da Conceição, (12) Niddy Gonzalvez, (28) Jecky Pello.
Skuad Karketu
Treinadór: Bernardo teye
(20) Egídio de Oliveira, (22) Nelson Viegas, (25) Yohanes Guimarães, (5) Reexy Kurimawan, (26) Batikara Socob, (14) Gaudêncio Montiro, (6) Mumin Mohammed, (10) Alexandre Lemos, (9) Daniel Kono, (7) Angenuku Viegas, (11) Jenivio Mota.
Suplente:
(1) Espertu Ferreira, (2) Edmundo Pereira, (3) Orgelio da Silva, (16) Davio Freitas, (15) Santiago da Costa, (18) Fulgencio Gonçalves, (8) António Marinho, (18) Carlos Sousa, (23) Tafariel Gonçalves, (13) Armando Bere, (77) Fernandes Junior, (4) Inigo Braz
Jornalista: Hortêncio Sanchez
Editór: Xisto Freitas da Piedade
