DILI, 23 setembru 2024 (TATOLI)–Diretór Ezekutivu Forum Organizasaun Naun Governamental Timor-Leste (FONGTIL), Valentim da Costa Pinto, sujere ba Parlamentu Nasionál atu elimina lei kona-ba subsidiu pensaun vitalísia ba eis titulár hanesan antigu membru Governu no membru Parlamentu Nasionál sira.
Notísia Relevante: PPN simu ona proposta alterasaun ba lei pensaun vitalisia no iha ona faze konsultasaun
Dirijente ne’e hateten, sosiedade sivil apresia no agradese ba deputadu sira iha Parlamentu Nasionál, bainhira iha hakarak no hahú halo konsultasaun kona-ba alterasuan lei pensaun vitalisia ba antigu membru Governu no Parlamentu Nasionál, tanba lei kona-ba subsídiu pensaun vitalísia no regalia sira seluk ne’e lá fó benefisiu ba Estadu no povu Timor-Leste.
“Ami agradese tebes se Parlamentu Nasionál diskute kona-ba alterasaun lei pensaun vitalísia. Tanba ami ezijénsia iha inisiu kedas, bainhira implementa lei ida-ne’e, ami kontra kedas. Lei ida-ne’e la devia iha no hodi halo lei ida-ne’e,” Diretór Ezekutivu Forum Organizasaun Naun Governamentál Timor-Leste FONGTIL, Valentim da Costa Pinto, hateten ba Agência Tatoli, iha salaun Eskola Téknikua Vokasionál (TEKVOK) iha Becora.
Hein katak, lei ida-ne’e partidu polítika sira-ne’ebé hetan asentu iha Parlamentu Nasionál (PN) iha konkordánsia ida hodi bele elimina lei ne’e.
“Bankada hotu-hotu iha Parlamentu Nasionál bele konkorda malu hodi bele halo revizaun. Maibé, ami-nia esperansa ida-ne’e elimina tiha. Ami-nia rekomendasaun mak atu elimina,” nia dehan.
Nia argumenta, Timor-Leste kontinua enfrenta problema sosiál barak tebes ne’ebé presiza mellora no dezenvolve hodi hadi’a Povu nia moris no hala’o dezenvolvimentu rai ida-ne’e.
“Situasaun atuál agora iha rekursu uitoan, iha situasaun ai-moruk laiha, edukasaun la’o la di’ak no movimentu merkadu laiha, ami sujere elimina atu Governu iha orsamentu naton hodi ajuda ministériu sira seluk hodi halo dezenvolvimentu,” nia hateten.
Jornalista : Jesuína Xavier
Editór : Cancio Ximenes
