DILI, 11 novembru 2024 (TATOLI)–Diretór Esekutivu Forum Organizasaun Naun Governamental Timor-Leste (FONGTIL), Valentim da Costa Pinto, hateten loron 12 novembru nu’udar loron istóriku ba timoroan sira-nia luta ba ukun rasik aan.
“Loron ba masakre Santa Cruz 12 Novembru Governu ho sobrevivente selebra loron istóriku ne’ebé fó atensaun ba mundu internasionál hodi bele fó apoiu solidariedade ba ita-nia luta autodeterminasaun ba ukun rasik aan,” Direór FONGTIL, Valentim da Costa Pinto, hateten ba jornalista sira, iha Faról.
Nia hateten, iha tinan 33 ne’e importante atu foinsa’e sira dignifika eroi sira luta ba libertasaun nasionál liuhusi prosesu dezenvolvimentu nasionál.
“Tinan ida-ne’e tinan ida-ne’ebé husu ita nia foinsa’e sira valoriza dignifika ita-nia eroi sira hodi hatudu iha asaun konkreta sira. Ba tinan hirak mai oin, ita presiza joven sira-ne’ebé tenke brani hatudu sira-nia maturidade hodi ultrapasa dezafiu sira-ne’ebé ita hasoru ita-nia rai,” nia dehan.
Foinsa’e tenke la’o tuir eroi sira-nia ain fatin ba autór ba mudansa no transformasaun ba rai ida-ne’e, tan ne’e reflesaun ba tinan ida-ne’e atu fó sentidu oinsá enkoraja autór ba asaun barak husi joven sira ba mehi eroi sira-nian ba autodeterminasaun nian.
Nia enkoraja foinsa’e sira atu sai primeira liña hodi promove ranformasaun ba dezenvolvimentu nasionál.
Joven sira uluk unidu loos ba asuntu luta ba ukun rasik aan, maibé agora iha problema tanba foinsa’e sira inklina ba grupu, foinsa’e la iha serbisu no ba rai-li’ur, tanba ne’e mak entidade públiku sira tenke hare ba asuntu ne’e.
“Ita-nia ukun-na’in sira no setór privadu sira tenke haree didi’ak ida-ne’e hodi asegura rekursu sira-ne’ebé iha hodi halo buat ruma ba ita-nia rain. Sira labele la’o buka sorte iha ema -ia rain hodi buka sorte no halakon esperansa ba future, atu kontribui ba dezenvolvimentu nasionál,” nia hateten.
Nia rekomenda, Governu tenke apoiu setór privadu sira hodi loke kampu serviisu ba joven sira, hanesan kriasaun sentru produsaun sira.
Nia preokupa tanba, alokasaun orsamentu ba setór produtivu sira kiik iha Orsamentu Jerál Estadu 2025, nune’e sai sei sai dezafiu ba tinan hirak mai.
Jornalista : Jesuína Xavier
Editór : Cancio Ximenes
