DILI, 16 novembru 2024 (TATOLI)–Prezidente Autoridade Munisipal Dili (AMD), Gregorio Saldanha, hateten Governu liuhosi AMD prepara dezeñu, urna no osuáriu atu muda rate iha semitériu Santa Cruz, hodi bele loke dalan atu bele ba Sebasião Gomes nia kampa.
Gregorio Saldanha hateten, Estadu iha dever atu fó hatene no koordena ho família, hein família nia vontade no liberdade atu hamamuk fatin sira-ne’e.
Tuir nia, AMD enkontru ona ho família no maioria konkorda, tanba ne’e mak prosesu tuir mai mak tenke hasai, tanba nia fiar katak família sira sei koopera ho Governu.
“Ha’u mai iha ko’alia ona atu ekipa Governu, Komité 12 Novembru no empreza bele iha dezeñu Governu no AMD iha dever atu halo ida-ne’e atu familia hatene katak se rate kee tiha sei rai iha ne’e. Segundu, sei prepara urna hodi bele tau restu mortál kuandu kee sai, provizoriamente, kuandu fatin Governu prepara ona. Ita tenke tau fatin ne’ebá. Ita prepara kondisaun uluk,” Prezidente Autoridade Munisipal Dili (AMD), Gregorio Saldanha, ba jornalista sira, iha Santa Cruz..
Ekipa identifika rate besik 50 hanesan ne’e mak identifikadu ona hodi muda no bele loke dalan parte leten-kra’ik hodi loke dalan, tanba iha movimentu barak iha loron boot sira hanesan 12 novembru no finadu sira-ne’e.
Prezidente ne’e hateten, Governu hakarak fatin Santa Cruz iha dalan ema atu la’o no sai jardín di’ak, tanba ne’e mak sei kuda ai-oan sira no ai-funan.
Tuir observasaun TATOLI iha terrenu, empreza Bobolait Unipesoál, Lda, prepara ona osoáriu iha fatin tolu iha Semitériu Santa Crúz hodi bele rai provizoriamente.
Jonralista : Jesuína Xavier
Editór : Cancio Ximenes
