DILI, 20 dezembru 2024 (TATOLI)–Diretór Ezekutivu Asosiasaun Defisénsia Timor-Leste (ADTL), Cesário da Silva, hateten ADTL sei reforsa advokasia ba ema ho defisiénsia iha tinan oin, hodi sira bele hetan mós oportunidade no iha inkluzaun sosiál iha setór hotu-hotu.
Nia esplika, ADTL tenke sai sentru rekursu ba organizasaun hotu-hotu hamutuk ho ema ho defisiénsia sira atu bele hetan preparasaun rekursu ba membru sira.
“Ita-nia prioridade ida mak atu sensibiliza komunidade no ema hotu atu hasa’e konsiénsia públiku kona-ba direitu ema ho defisiénsia no halo advokasia iha nivel hotu-hotu iha polítika no iha baze mak hasa’e konsiénsia,” nia hateten ba Agência TATOLI hafoin hala’o enkontru anuál entre membru ADTL nian, iha Mascarinhas.
Diretór ne’e konsidera, iha sosiedade Timor nian ema balun iha ona konsiénsia, bainhira iha ona informasaun adekuada liuhusi midia maibé balun seidauk iha koñesimentu kona-ba inkluzaun sosiál.
“Iha situasaun balun ema kontinua hanoin karidade, tulun ema ho defisiénsia. Buat ne’ebé, ita hakarak ne’e atu empodera ema ho defisiénsia. Ita tenke hanoin hadi’a kondisaun atu ema ho defisiénsia bele hola parte iha sosiedade,” nia dehan.
Tuir nia, pensamentu karidade iha Timor-Leste kontinua boot maibé iha mudansa uitoan tanba ema barak hanesan organizasaun sosiedade sivil no parseiru dezenvolvimentu sira hahú ona ko’alia kona-ba direitu ema ho defisiénsia.
Direitu ema ho defisiénsia ema hotu ko’alia maibé maneira oinsá atu hakbiit ema ho deifisiénsia ne’e kontinua presiza.
Tuir relatóriu Planu Asaun Nasionál ema ho Defisiénsia 2014-2018 husi Ministériu Finansa nian ne’e ema ho defisiénsia iha Timor-Leste ne’e hamutuk 48.243.
Jornalista : Jesuína Xavier
Editór : Cancio Ximenes
