DILI, 12 Maiu 2025 (TATOLI)–Governu liuhusi Institutu Nasionál Defeza Direitu ba Labarik (INDDICA-sigla portugés), Institutu Públiku, segunda ne’e, realiza semináriu hodi atualiza progresu implementasaun Lei Númeru 6/2023 kona-ba joven no labarik iha perigu.
Prezidente INDDICA, Dinorah Granadeiro, hateten Governu ladauk implementa ho di’ak Lei Númeru 6/2023 kona-ba joven no labarik iha perigu, tanba ne’e ho semináriu ida-ne’e oinsá autór judisiál sira implementa lei referida.
“Ita-nia autór judisiáriu no mós ita-nia instituisaun ne’ebé iha kna’ar no responsabilidade ba implementasaun Lei Protesaun Labarik no Joven iha Perigu hodi bele integra didi’ak, atu sira bele implementa,” Dinorah Granadeiro hateten ba jornalista sira iha Sentru Formasaun Jurídika Judisiária, Kaikoli, segunda ne’e.
Nia dehan, importánsia husi semináriu ne’e sei mai ho rezultadu ida-ne’ebé Fundu Nasaun Unidade ba Labarik (UNICEF-sigla inglés) rasik aprezenta katak depoizde semináriu ida-ne’e sei mai ho dezenvolve módulu ida-ne’ebé ko’alia kona-ba Lei Protesaun Labarik no Joven iha Perigu, hodi módulu ne’e bele integra iha Sentru Formasaun Judisiária, atubele sai hanesan matéria ida ba formasaun ba autór judisiáriu sira hodibele hatene.
“Ha’u hanoin Lei Númeru 6/2023 kona-ba joven no labarik iha perigu, lei ne’e di’ak tebes. Lei ne’e hein iha tinan barak nia laran no lei ida-ne’e kuaze instituisaun sira-ne’ebé iha responsabilidade hala’o kna’ar atu implementa lei ne’e rasik, seidauk hatene didi’ak kona-ba sira-nia kna’ar no responsabilidade liga ho implementasaun lei ne’e,” nia esplika.
Nia dehan, tanba ne’e mak Ministériu Justisa iha inisiativa halo semináriu ida-ne’e, atu divulga lei ne’e ba iha autór judisiáriu sira no buka mekanizmu oinsá mak lei ne’e bele implementa duni iha instituisaun idak-idak ne’ebé mak responsabiliza ba lei ne’e.
Iha fatin hanesan, Prezidente Tribunál Rekursu, Afonso Carmona, esplika semináriu ne’e atu halo diskusaun, se altera bele altera tuir situasaun reál ne’ebé iha.
“Semináriu ne’e ko’alia kona-ba labarik no joven iha perigu. Iha semináriu ne’e bele hetan konteúdu husi lei ne’e, karik bele altera liga ho situasaun reál iha Timor ne’e para fásil ita aplika,” nia dehan.
Tuir Carmona, semináriu ne’e ko’alia kona-ba joven no labarik iha perigu, signifika lei ne’e atu hala’o hodi rezolve problema kona- ba labarik no joven sira-nian.
“Sira-ne’ebé partisipa iha semináriu ne’e labele haree lei ne’e, hotu ona, maibé bele iha pontu importante ne’ebé hili. Iha mós ekipa Reforma Setór Justisa, atu iha reforma ba setór justisa, lei ne’e mós bele tama bá iha programa ne’ebá,” nia konklui.
Jornalista: Natalino Costa
Editór: Xisto Freitas da Piedade
