Jet privadu C700 aterra iha AIPNL tanba hetan pedidu husi MNEK
DILI, 08 Jullu 2026 (TATOLI) – Ministru Transporte Komunikasaun, Miguel Marques Manetelu, esplika katak Autoridade Aviasaun Sivíl Timor-Leste (AACTL, sigla portugés) fó autorizasaun ba jet privadu ho tipu Cessna Citation 700 Longitude (C700) tun iha Aeroportu Internasionál Prezidente Nicolau Lobato (AIPNL), Dili, tanba hetan pedidu aterrazen husi Ministériu Negósiu Estranjeiru no Kooperasaun (MNEK).
Governante ne’e esplika katak tuir prosesu administrativu nian, pedidu ba aterrazen aviaun nian ne’e haruka ba MNEK, no Ministériu Transporte no Komunikasaun (MTK) simu nota verbál husi MNEK. Bainhira iha nota ne’e hateten buat hotu loos maka bele prosesa no ministériu hasai despaxu ba AACTL hodi prosesa no aviaun tun.
Nune’e, haree husi prosedimentu ka prosesu administrativu ne’e loos, tanba despaxu ne’ebé ministériu hasai ne’e bazeia ba nota verbál ne’ebé mai husi MNEK. Tanba pedidu sira ne’ebé mai husi ajénsia ka nasaun ne’ebé de’it ba aviaun ida atu tun iha aeroportu, pedidu ne’e haruka ba MNEK no la’ós ba MTK.
Relasiona ho aviaun jet privadu ne’e, governante ne’e dehan para iha aeroportu ho objetivu atu lori ka tula ema, tanba iha pedidu ne’e hateten ema ne’e bainaka Prezidente Repúblika, José Ramos-Horta nian.
“Maibé hafoin aviaun jet privadu ne’e to’o, ha’u iha serimónia Embaixada Amérika nian, de repente hetan informasaun katak, ema sira ne’ebé tuir perdidu, katak bainaka Prezidente Repúblika nian laloos, entaun ha’u telefone kedas ba AACTL atu prende. AACTL hamutuk ho entidade prende duni aviaun ne’e no la semo”, Miguel Manetelu hateten iha Palásiu Governu, ohin.
Nia dehan kona-ba prezensa jet privadu ne’ebé lori Prezidente Repúblika nia-naran ne’e husu atu halo investigasaun, tanba husi ne’e mak bele hatene no MTK só bele ko’alia kona-ba prosedimentu administrativa ba autorizasaun aviaun aterrazen nian. Kona-ba asuntu seluk prosesu investigasaun la’o no ida-ne’e parte Polísia Nasionál Timor-Leste mak hatene.
Notísia relevante: Servisu Migrasaun klarifika entrada sidadaun indonézia na’in-tolu ho Jet Privadu
Jornalista: Arminda Fonseca
Editora: Maria Auxiliadora
