KOVALIMA, 13 Maiu 2025 (TATOLI) – Ministra Edukasaun Dulce de Jesus akompaña hosi reprezentante komandante jerál PNTL, Superintendente Xefe Jorge Monteiro, tersa-ne’e, halo promosaun ba membru promovidu ho promosaun tranzitóriu no promosaun tanba antiguidade ba membru PNTL hamutuk membru hamutuk na’in-139 iha komandu PNTL munisípiu Kovalima.
Membru hirak ne’ebé mak promovidu ba iha postu superintendente asisténte na’in-hitu, inspetór xefe na’in-lima, inspetór na’in-ualu, inspetór asistente na’in-35, Sarjentu xefe na’in- 49, primeiru sarjentu 25, ajente xefe neen no ajente prinsipál na’in-haat.
Ministra Edukasaun Dulce de Jesus dehan, impozisaun diviza ba membru PNTL sira la’ós hanesan prezente maibé bazeia ba membru PNTL fó nia dedikasaun hahú foin forma nasaun Timor-Leste.
“Impozisaun diviza la’ós prezente tanba ita-boot sira fó nia dedikasaun iha momentu foin forma nasaun hodi firmi atu luta ba nasaun ida-ne’e ho limitasaun ne’ebé mak iha” Governante ne’e hato’o liuhusi nia diskursu iha seremónia promosaun diviza iha kampu rezidénsia PNTL nia oin.
Autoridade másima edukasaun ne’e dehan, nonu Governu konstituisionál nia programa fó prióridade halo promosaun diviza ba PNTL, molok atu hala’o seremónia impozisaun, halo uluk analiza ne’ebé kle’an hodi haree semak merese atu halopromosaun diviza hafoin aprezenta iha Konsellu Ministru hodi diskuti no aprova proposta.
Ho nune’e nia dehan, PNTL nia servisu atu hametin lei no ordén la’ós servisu ne’ebé kmaan. Servisu durante ne’e hasoru dezafiu oioin, hamriik-metin to’o ohin loron la’ós fasil hodi harii instituisaun PNTL ho di’ak presiza membru PNTL nia firmeza no kontribuisaun.
“Ohin ita mai iha fatin ida-ne’e atu hala’o seremónia inpozisaun diviza ba membru PNTL ne’e. Ha’u kontente tanba iha protetór di’ak. Ha’u fiar katak anteriór dedikasaun ho tempu-naruk ho prestasaun servisu ne’ebé di’ak”, nia dehan.
Hafoin inpozisaun diviza ida-ne’e PNTL sei hala’o papél di’ak liután, tanba tuir ministra katak durante sai membru governu, pesoál seguransa proteje nia iha tempu saida de’it mak nia presiza. Instituisaun PNTL atu sai metin tenke servisu ho responsabilidade hodi ejize profisionalidade, onestidade, integridade, kredibilidade no kualidade atendementu iha povu nia leet.
“Ha’u fiar ita-boot sira prienze ho valór ne’ebé di’ak ho impozisaun diviza forma servisu kompozisaun servisu ne’ebé hala’o ona hanesan komprometidu husi Nonu Governu konstituisionál fó apresiasaun ba membru PNTL ne’ebé prestasaun servisu ho di’ak”, nia hateten.
Ho seremónia inposizaun diviza hodi fó motivasaun ba kada membru PNTL sira seluk atu hala’o servisu ho di’ak liu nune’e bele kontribui sosiedade ba seguru no trankuilidade iha futuru.
Reprezentante Komandante Jerál PNTL, Seperintendete Xefe,Inspetór Jorge Monteiro reforsa, seremónia impozisaun diviza liuhusi promosaun tranzitóriu no promosaun liuhusi promosaun por antiguidade.
“Ha’u-nia komitmentu hodi halo revizaun estatu pesoál PNTL númeru 69/2022 estatutu pesoál PNTL númeru 35/2024 hodi hamosu artigu 151.o husi alinea ida to’o sia nune’e ita membru PNTL sira bele iha oportunidade hodi goza promosaun tranzitóriu”, nia espika.
Reprezentante Komandu Jerál PNTL hamutuk ho ofisiál sira hodi asegura seremónia impozisaun ne’e hanesan responsabilidade prinsipál komandu PNTL hodi mantein bein-estrar membru PNTL sira liuhusi sistema ho métodu ho mekanizmu sira vigora iha lei no regulamentu vigora ona.
Ho atividade seremónia impozisaun diviza marka pasu diferénsia importante no krusiál iha jornada viajen instituisaun PNTL ein-jerál espesiál iha komandu PNTL munisípiu Kovalima hodi rekoñese no valoriza membru PNTL ba iha sira-nia prestasaun servisu.
“Prestasaun servisu, disiplina, lealidade, neutralidade no imparsiál hanesan exelente, profesionál hanesan esperansa no espetativa ita-nia Estadu, Governu no ita-nia instituisaun ita-nia sidadaun tenke kria posibilidade, esforsu hotu hodi tane aas, defende no servi no proteje atende no asegura”, nia afrima.
Imposizaun diviza tranzitóriu no promosaun por antiguidade ne’ebé atribui ona la’ós oferta , prémiu, prezente no la’ós mós rekompensa gratuita maibé hanesan rekoñesimentu altu husi Estadu, Governu no Instituisaun PNTL hanesan direitu fundamentál hanesan membru PNTL, disiplina servisu loialidade, prontidaun servisu durante tinan-naruk.
“Ita-boot sira-nia umildade servisu iha misaun servi no proteje no dedikasaun servisu profesionál, sakrifísiu estra-ordináriu durante tinan-naruk iha instituisaun PNTL, ba ita-boot sira-nia lealidade ba Estadu no ba ita-nia instituisaun”, nia fó hanoin.
PNTL hanesan instrumentu Estadu direitu demokratiku Timor-Leste ba asuntu seguransa interna no sai hanesan pilár ba dahuluk Estadu ni’an ba aspetu seguransa nasionál no seguransa interna asumi responsabilidade importante krusiál garante pás transkilidade no estabilidade seguransa kria situasaun ne’ebé hakmatek ba nia sidaudaun sira.
Notísia relevante:Komandu jerál PNTL fó orientasaun pontu lima ba komandante munisípiu
Jornalista:Celestina Teles
Editór: Rafael Ximenes de A. Belo
