DILI, 28 Maiu 2025 (TATOLI) – East Timorese Association Peterborough (ETAP) konsidera katak kontribuisaun Timoroan diáspora signifikadu bo’ot tebes ba dezenvolvimentu nasionál no prezervasaun kultura.
“Primeiru, suporte (apoiu) ekonomia Timor-Leste liuhusi remiténsia diáspora nu’udar rekursu importante ohin loron iha dezenvolvimentu nasionál. Tuirmai, organizasaun timoroan diáspora nu’udar instrumentu vitál hodi responde ba dezastre naturais ne’ebé mosu iha Timór. Ikusliu, partisipasaun polítika liuhusi involvimentu timoroan diáspora iha eleisaun. Ida-ne’e hametin liután relasaun entre diáspora ho rai-doben Timor”, Koordenadór ETAP, Celso Oliveira, hateten, tuir komunikadu ida ba TATOLI, ohin.
Celso Oliveira hatutan, Timoroan diáspora barak mak lori ba Timor-Leste sira-nia abilidade no matenek hodi tulun haburas kreximento ekonómiku.
“Timor-oan barak ne’ebé hela iha rai-li’ur hetan esperiénsia ne’ebé iha valór, ne’ebé sira lori fila ba Timor-Leste liuhusi programa empregu no inisiativa investimentu. Ida-ne’e ajuda hadi’a kapasidade rekursu umanu no haburas kreximentu ekonómiku”, nia hatutan.
Reflesaun iha 20 Maiu
ETAP organiza selebrasaun tinan-23 loron Independénsia Nasionál iha loron Tersa, 20 Maiu 2025 iha Unity Hall, Northfield Road, sidade Peterborough, Reinu Unidu.
“Objetivu selebrasaun ida-ne’e hodi halibur Timoroan sira, hodi halo reflesaun hanoin hikas sakrifísiu erois sira-nian iha prosesu libertasaun nasionál no kontribuisaun Timoroan diáspora iha dezenvolvimentu nasionál,” komunikadu ne’e refere.
Selebrasaun ida-ne’e hetan partisipasaun husi polísia komunitária Peterborough, estrutura ETAP, voluntáriu sira no líder komunidade sira seluk.
Entretantu, dezde 2021 ETAP nu’udar charity rejistadu iha Charity Commission UK ho objetivu atu fó apoiu ba Timoroan iha sidade Peterborough no área sira seluk. Oras ne’e daudaun, ETAP iha Centro de Apoio ne’ebé ofisialmene loke Segunda to’o Sexta hodi fó atendimento gratuitu ba sidadaun Timoroan ne’ebé hetan difikudade no prezisa tulun. ETAP mos halo atividade desportiva no kulturál hodi prezerva Timor-Leste nia kultura no hametin nafatin amizade no unidade nasionál.
Hafoin Timor-Leste ukun rasik aan, timoroan barak feto no mane deside buka moris no servisu iha Reinu Unidu. Oras ne’e, ema timoroan besik rihun ida mak hela no servisu iha sidade Peterbroough. Inan-aman servisu makaas iha fábrika no empreza oioin maibé oan sira frekuenta eskola bázika, kolejiu no universidade.
Iha parte seluk, iha fulan-Jullu nia laran ETAP sei organiza estudante klosan balun halo vizita ba Westminster Parliament London hodi hatene kona-ba istória Parlamentu UK. Nune’e mós sei organiza Xanana Cup III hodi halibur timoroan sira liuhusi tebebola.
Jornalista: Alexandra da Costa
Editór: Rafael Ximenes de A. Belo
