DILI, 03 Juñu 2026 (TATOLI) – Líder Igreja Katólika, Papa Leão XIV, dedika fulan Juñu 2026 nu’udar loron halo orasaun no reflesaun kona-ba valór sira desportu nian, hodi husu ba sarani katólika sira iha mundu tomak uza desportu nu’udar meiu ba dame, fraternidade, solidariedade, no unidade entre nasaun sira.
Liafuan ne’e hato’o liuhosi vídeo mensál “Pray with rhe Pope” ne’ebé publika hosi Pope’s Worldwide Prayer Network ka Rede Orasaun Mundiál Amu-Papa nian.
Iha ninia mensajen orasaun, Amu-Papa Leão XIV rekoñese katak desportu iha benefísiu boot ba ema nia moris, maski iha dezafiu sira. Tanba ne’e, Amu-Papa konvida sarani sira atu reza atu atividade desportiva hotu bele promove dame no fraternidade.
Amu-Papa espresa agradesimentu ba “Ddom do desporto”, ne’ebé nia hatete bele fó glória ba Maromak liuhosi atividade fíziku, harii amizade sira, no kria ksolok liuhosi serbisu iha ekipa.
“Iha moris ne’e, hanesan jogu ida, laiha ema ida maka salva mesak. Ita presiza ema seluk atu buras, aprende respeita ema seluk, ultrapasa limitasaun sira, no selebra vitória hamutuk,” Papa Leão XIV hateten ne’ebé sita hosi Vatican News.
Nia subliña katak desportu tenke sai hanesan “eskola fraternidade nian”, la’ós arena mamuk ida kompetisaun nian, no espasu ida ba enkontru no diálogu, la’ós fatin eskluzaun nian ka violénsia nian.
Amu-Papa mós konvida atleta, treinadór sira, no apoiante desportu sira atu haree desportu nu’udar lian universál ne’ebé bele halibur kultura sira, hametin lasu sira entre nasaun sira, no kuda respeitu, solidariedade, no auto-dezenvolvimentu.
“Karik desportu hothotu sai hanesan imajen ida hosi moris ida ne’ebé moris ho Maromak, serbisu ho ksolok no esforsu, moris ho haraik-an iha derrota, no ho agradesimentu iha vitória”, nia hateten.
Iha konkluzaun orasaun nian, Amu-Papa Leão XIV husu ba Espíritu Santu atu kontinua halibur umanidade nu’udar “ekipa ida de’it” hodi harii komuñaun no fraternidade iha istória mundu tomak.
Mensajen ida-ne’e hato’o iha momentum importante mundu desportu internasionál nian iha fulan-Juñu 2026, ne’ebé sei marka ho kompetisaun mundiál boot oioin.
Eventu futeból boot liu iha mundu, Tasa Mundiál FIFA 2026, sei hala’o iha loron 11 fulan-Juñu to’o loron 19 fulan-Jullu tinan 2026, iha Estadu Unidu, Kanadá, no Méxiku. Ida-ne’e sei sai hanesan torneiu dahuluk ne’ebé sei konta ho nasaun 48.
Aleinde ne’e, kompetisaun basketebol Finál NBA 2026 sei hala’o iha loron 03 to’o 19 fulan-Juñu, enkuantu torneiu ténis Kampeonatu Wimbledon 2026 sei hahú iha loron 29 fulan-Juñu iha Inglaterra.
Mundu korrida Fórmula 1 nian sei sai mós uma-na’in ba eventu importante oioin iha fulan-Juñu tomak, inklui Grande Prémiu Mónako nian iha loron 07 fulan-Juñu, Grande Prémiu España nian iha loron 14 fulan-Juñu, no Grande Prémiu Áustria nian iha loron 28 fulan-Juñu.
Entretantu, Torneiu Golfe U.S. Open 2026 nian marka ona ba loron 18-21 fulan-Juñu, no Tasa Mundiál T20 Feto ICC nian 2026 sei hala’o hosi loron 12 fulan-Juñu to’o inísiu fulan-Jullu.
Impulsu hosi kompetisaun internasionál oioin sira-ne’e haree hanesan aliña ho mensajen hosi Papa Leão XIV, ne’ebé subliña importánsia hosi desportividade, respeitu ba ema seluk, no dame liuhosi desportu.
Amu-Papa nia Rede Orasaun Mundiál ne’e rasik nu’udar inisiativa papal (kepausan) ne’ebé harii iha tinan 1844 ho naran Apostuladu Orasaun nian no konfia ba Sosiedade Jesus nian.
Rede orasaun ne’e rasik agora iha ona nasaun liu 92, ho komunidade espirituál ida ho membru liu millaun 22 iha mundu tomak. Ninia misaun prinsipál ida mak atu habelar Amu-Papa nia intensaun orasaun fulan-fulan nian kona-ba dezafiu umanitáriu oioin no misaun Igreja Katólika nian iha mundu.
Jornalista: Arminda Fonseca
Editór: Evaristo Soares Martins
