DILI, 24 Juñu 2025 (TATOLI)—Estudante timoroan na’in-15, kompostu husi feto hitu mane ualu, ne’ebé hala’o estudu iha Arava International Center of Agriculture Training (AICAT) Israel, hahú tinan 2024 to’o 2025 daudaun ne’e to’o ona Bali, Indonézia no semana ne’e sei kontinua viajen mai Timor-Leste.
Estudante timoroan, Egas da Silva, ne’ebé daudaun ne’e hala’o hela estudu iha AICAT, haktuir, ninia kolega na’in-15 to’o ona iha Bali desde Domingu (22/06).
“Sira sai husi Israel horibainrua, liuhusi Egiptu, ida-ne’e mós tuir terrestre sa’e bus durante oras ualu foin to’o Egiptu. Hafoin to’o mak sira foin sa’e aviaun liuhusi Qatar bá Bali,” estudante ne’e informa ba Ajénsia TATOLI via telefónika, Tersa ne’e.
Notísia relevante : Estudante AICAT 51 iha Israel seguru
Nia dehan, estudante sira ne’e tenke liuhusi nasaun Egiptu tanba aeroportu iha ne’ebá mak loke no halo operasaun tanba iha Autoridade seidauk fó autorizasaun halo operasaun aeroportu.
Iha sorin seluk, estudante AICAT ne’ebé to’o ona iha Bali, Dealova Almeida Gusmão, konfirma, daudaun ne’e sira iha ona.
“Ami hamutuk 15 pessoas no ami mai liuhusi Egiptu ho razaun tanba aeroportu Israel taka tanba situasaun funu namanas hela. Entaun, husi Israel bá Egiptu ami ho bus to’o iha Cairo mak sa’e aviaun bá Qatar,” estudante ne’e informa.
Nia konta tuir, nia ho nia kolega seluk hetan akompañamentu husi parte seguransa Egiptu nian durante viajen.
“Iha bus laran laiha tan ona ema seluk, mesak timoroan ho kondutór no seguransa na’in-rua husi eskola. Agradese buat hotu di’ak de’it to’o mai iha Bali tanba Militár Egiptu sira mak halo seguransa mai ami, sira sempre tau prioridade liu kona-ba seguransa nian, no ami nunka mais tauk tamba ami iha situasaun seguru,” nia tenik.
Dealova Almeida hateten, nia ho kolega seluk termina ona sira-nia estudu durante fulan-sia iha AICAT, nune’e parte eskola toma konta sira-nia viajen husi Israel bá Egiptu.
“Ami hela iha otél iha Bali no sei fila bá Timor, kolega balun loron 25 Juñu arranka ona bá Timor no balun loron 28 Juñu mak arranka,” nia katak.
Estudante na’in-15 ne’e husi estudante na’in-50 ne’ebé foin lalais Governu Timor-Leste liuhusi Ministériu Agrikultura Pekuária Peskas no Floresta (MAPPF) haruka hala’o estudu iha AICAT iha tinan 2024.
Jornalista : Alexandra da Costa
Editora : Julia Chatarina
