DILI, 17 Agostu 2025 (TATOLI) – Primeiru-Ministru, Xanana Gusmao, lansa fatuk dahuluk ba konstrusaun edifísiu maternidade foun ho andár haat, iha Ospitál Nasionál Guido Valadares (HNGV, sigla portugés), projetu finansiadu husi Governu Japaun, liuhusi Ajénsia Kooperasaun Internasionál Japaun (JICA, iha inglés), ho valór millaun $20.
Durante serimónia, Xanana Gusmao, agradese ba povu japonés nia apoiu ba Timor-Leste no subliña katak infraestrutura ne’e reprezenta pasu importante atu melhora kualidade servisu ospitalár iha nasaun.
“Ida-ne’e nu’udar faze foun ba dezenvolvimentu servisu ospitalár nian, oinsá fó atendimentu saúde ne’ebé di’ak liu ba povu”, Xefe Governu afirma iha serimónia ne’e.
Konstrusaun edifísiu, ne’ebé inklui sala 77 no instalasaun moderna oioin, sei ezekuta husi empreza Wakachiku Construction Co., Ltd., ho konsultoria Oriental Consultants Global Co., Ltd., no sei remata iha fulan-Abril 2027.
Embaixadór Japaun iha Timor-Leste, Tetsuya Kimura, destaka projetu ne’e reflete kompromisu Japaun nian hodi hadi’ak setór saúde iha país ne’e.
“Onra boot ida ba ha’u partisipa serimónia lansamentu fatuk dahuluk ho prezensa husi eselénsia Primeiru-Ministru. Japaun atribui importánsia boot ba apoiu Timor-Leste nia setór saúde, aliña ho ita-boot sira-nia politika nasionál ba prestasaun kuidadadu saúde primáriu ho kualidade no servisu médiku ba sidadaun hotu-hotu”, nia dehan.
Diplomata japonés ne’e salienta katak Japaun investe maka’as iha setór ne’e durante tinan sanulu liubá, ho apoiu liu millaun $80.
“Ami nia inisiativa sira inklui harii no hadi’a unidade emerjénsia obstétriku no neonatál hamutuk 20, iha munisípiu 12, estabelese postu saúde iha área remota sira, fornese ambulánsia, no formasaun médika no bolsa estudu ba ofisiál sira Ministériu Saúde nian”, nia relata.
Embaixadór ne’e salienta mós katak Japaun ajuda moderniza departamentu emerjénsia no fornesimentu sala foun ida ne’ebé ekipadu ho ultrasonografia iha setór radiolojia no disponibiliza voluntáriu japonés na’in-haat ne’ebé daudaun presta serbisu iha ospitál, hanesan farmaséutiku, enfermeiru, nutrisionista, no espesialista iha ekipamentu médiku.
Embaixadór ne’e fiar katak projetu konstrusaun foun ida-ne’e sei aumenta mós kapasidade sirúrjika, hasa’e kualidade kuidadu perinatál, optimiza ba resposta médíku emerjénsia no hametin formasaun ba profisional kuidadu saúde sira.
Ministra Saude, Élia dos Reis Amaral, salienta katak edifísiu foun maternidade ne’e apoiu gratuitu husi povu Japaun ba Timor-Leste.
“Ohin ita halo ona inaugurasaun, signifika hahú ohin konstrusaun la’o ona. Konstrusaun ne’e ita hein simu xave de’it”, Élia Amaral dehan.
Governante ne’e kongratula povu Japaun ba apoiu ne’ebé durante ne’e fó ba Timor-Leste. “Japaun no Timor-Leste nu’udar país amigu ne’ebé halo relasaun to’o ohin”, nia hato’o.
Tuir Reprezentante JICA iha Timor-Leste, Ito Mimpei, akordu subvensaun entre JICA no Governu Timor-Leste asina ona iha loron 20 Agostu 2024.
“Objetivu husi projetu ne’e mak atu hametin prestasaun servisu no hasa’e kualidade servisu médiku iha Ospitál Nasionál Guido Valadares, úniku ospitál nivel tersiáriu iha nasaun ne’e, liuhusi konstrusaun sira no fornesimentu ekipamentu médiku relasionadu, nune’e kontribui ba hadi’a sistema saúde iha Timor-Leste”.
Projetu ne’e atu reforsa kapasidade HNGV, liuhusi hadi’ak instalasaun no fornesimentu ekipamentu modernu. Sei harii departamentu ambulatóriu, sala sirurjia, Departamentu Sentrál Esterializasaun (CSSD, iha inglés), no área kompromisu ho Ministériu Saúde.
Notísia relevante: Agostu 2025: Governu sei lansa fatuk dahuluk ba konstrusaun edifísiu maternidade foun
Jornalista: Natalino Costa
Editora: Maria Auxiliadora
