KOVALIMA, 27 Agostu 2025 ( TATOLI) – Ministra Solidariedade Sosiál no Inkluzaun (MSSI), Veronica das Dores ho nia ekipa hamutuk ho Autoridade Kovalima distribui foos no ai-han komplementár ba família vulneravel sira iha postu administrativu Zumalai, Tilomar no Fatumea, iha munisípiu Kovalima.
“ Fó Apoiu la’ós han ba iha tempu naruk, maibé ai-han ne’ebé ami distribui atu fó netik ba maluk ne’ebé identifika husi xefe suku, xefa aldeia, tékniku sosiál no funsionáriu tomak reprezenta Governu”, Ministra Veronica das Dores hato’o iha nia diskursu iha Tilomar.
Governante fó hanoin ba xefe suku no xefe aldeia sira bainhira identifika família vulneravel no ema ho defisiente (EhD) sira labele haree ba koor partidu,maibé identifika família vulneravel ne’ebé presiza tulun duni.
“ Foos saku ida ita-boot sira sei han la to’o fulan tanba balun presiza fó apoiu ho mensál haree sira ne’e presiza duni maibé família sira seluk mós presiza fó apoiu ami identifika tuir kbi’it no forsa ne’ebé iha “nia esplika.
Ministra ho ekipa iha Kovalima hala’o atividade sira hanesan iha loron 24 Agostu ne’e distribui foos no ai-han komplementar ba família vulneravél iha postu administrativu Zumalai hamutuk 243. hafoin kontinua distribui iha postu administrativu Tilomar ba família vulneravél hamutuk 141 no iha fatumea hamutuk 200 .
Aleide fó apoiu, Governante mós hala’o atividade hodi hala’o vizita ba oan ki’ak na’in-12 iha Fatumea,observa direta konstruisaun edifísiu MSSI iha postu administrativu Fohorem no mós observa rai ba futuru atu konstrui edifisiu MSSI iha Tilomar
Iha biban hanesan, Administradór Postu Administrativu Tilomar,Venancio Sarmento, hato’o agradesimentu ba Ministra tanba foin ba dahuluk vizita postu Tilomar hodi distribui direta foos no ai-han komplementar ba família vulnerável sira.
“Família vulneravel sira lista mai housi suku haat hamutuk 141 simu apoiu hodi bele responde nesesidade iha uma”, nia agradese.
Jornalista:Celestina Teles
Editór:Florencio Miranda Ximenes
