KOVALIMA, 10 Juñu 2026 (TATOLI)-Reprezentante Administradór Postu Administrativu Suai, Vitor Gomes, alerta ba idozu no invalidéz sira atu uja subsídiu governu ba nesesidade bázikas la’ós utiliza ba joga karta no halo kultura lia moris no mate.
“Simu osan pensaun sosiál ba idozu no invalidéz la bele uza ba joga, maibé di’akliu investe iha setór edukasaun,” nia hateten iha salaun suku Beko.
Tuir observasaun autoridade lokál no komunitária sira-nia durante ne’e nota benefisiáriu sira barak uza subsídiu ne’e hodi ba joga karta, duke utiliza ba sosa hahán no nesesidade uma-laran nian, nune’e sujere atu uza hodi seu oan sira-nia osan eskola.
Bazeia ba dadus ne’ebé TATOLI asesu katak pagamentu pensaun sosial ba idozu no invalidéz faze dahuluk iha munisípiu Kovalima, benefisiáriu hamutuk 7.218 ho orsamentu hamutuk $ 1.638.560,00.
Husi totál idozu 6.843 ne’e tama iha kategoria husi tinan 60 to’o 69 hamutuk 2.019, feto 1.074 no mane 945.
Idozu ho tinan 70 to’o 79 hamutuk 3.365 kompostu husi feto 3.059 no mane 1.306. no mós idozu ho tinan 80-100 hamutuk 1.459 husi númeru feto 801 no mane 658
Tuir Plani Ministériu Solidariedade Sosiál no Inkluzaun (MSSI) liuhusi institutu Nasionál Seguransa Sosiál (INSS) sei halo pagamentu faze daruak iha tinan 2026 ba benefisiáriu idozu ho no invalidez iha loron 22 Juñu ne’e.
Jornalista:Celestina Teles
Editór:Florencio Miranda Ximenes
