DILI, 03 Setembru 2025 (TATOLI)—Autoridade Inspesaun Fiskalizasaun Atividade Ekonómia Sanitária no Alimentár kontinua halo divulgasaun informasaun ba operadór ekonómiku hanesan negosiante ambulante sira-neʼebé faan tabaku ilisítu (tabaku lulun) ba konsumidór sira iha Taibesi.
Notísia Relevante: PN husu autoridade kompetente presiza kontrola sirkulasaun tabaku ilísitu
“Ami fó hatene kategória sigaru neʼebé mak Governu bandu atu faan hanesan sigaru ho marka versaun lian Indonézia nian no bandu mós sira atu faan tabaku rahun hodi evita menoridade sira konsumu,” Diretora Operasaun AIFAESA, Claudinha Soares Pinto, hateten ba jornalista sira iha merkadu Taibesi, ohin.
Ekipa AIFAESA halo esplikasaun ba orpedór ekonómiku sira kona-ba sirkulasaun tabaku ne’ebé livremente sein selu taxa ba iha Governu, tanba ne’e operadór neʼebé kontinua faan sei hetan koima hahú husi $70 to’o $1.000.
“AIFAESA halo inspesaun ba sirkulasaun iha merkadu, enkuantu atu apreende tabaku iha fronteira ne’e kompeténsia husi parte seluk hanesan migrasaun nian. Ami mós halo ona enkontru ho sira para bele halo prevensaun,” nia hateten.
Maske nune’e atividade ne’e la’ós ramata de’it ona iha faze ne’e maibé sei iha kontinuasaun, katak iha faze dahuluk ekipa AIFAESA halo divulgasaun informasaun ba negosiante sira no iha faze tuir mai mak sei halo inspesaun hodi identifika irregularidade sira.
Reprezentante Negosiante Faan Tabaku, Ersilia da Costa Belo hateten, nia parte koopera ho AIFAESA nia programa maibé ninia moris garantia loos ba negósiu tabaku ilísitu, maske loron ida lahetan rendimentu barak hanesan loron ida hetan $5, karik faan ho pulsa ne’e bele hetan to’o $10.
“Maibé agora AIFAESA mai divulga informasain dehan ami labele faan tabaku lulun ho versaun lian Indonézia nian, no faan masu de’it, ida-ne’e bele impaktu ba ami-nia ekonómia,” nia dehan.
Nia dehan, se dehan AIFAESA sei prende bainhira kontinua faan sigaru lulun, entaun AIFAESA mós tenke suspende ba loja sira-ne’ebé nogosiante sira sosa tutan ba, tanba se lae sira kontinua faan.
Totál negosiante ambulante ne’ebé ohin loron AIFAESA halo inspesaun no divulga informasaun ba hamutuk na’in-10-resin ne’ebé iha fatin negósiu iha parte Taibessi nian.
Jornalista : Alexandra da Costa
Editór : Cancio Ximenes
