VIKEKE, 13 Setembru 2025 (TATOLI)—Xefe Suku Fatukero, Postu Administrativu Railaku, Munisípiu Ermera, Leoncia Trindade, dezafia feto potensiál sirqa munisípiu Vikeke labele lakon vontade maibé nafatin esforsu an hodi prepara an atu bele kandidata an ba xefe suku.
“Iha períodu ida-ne’e iha Munisípiu Vikeke, ita haree maluk feto sira asume kna’ar hanesan xefe suku feto iha suku 38. Tanba ne’e, ha’u dezafia nafatin ami-nia maluk feto sira labele lakon vontade, nafatin prepara an hodi tinan hitu mai bele konkorre iha eleisaun suku,” LeonciaTrindade hateten ba Agência Tatoli bainhira Governu liuhusi SEII hala’o estudu komparativu lori xefe suku feto sira hodi fahe esperiénsia ba feto potensiál iha Vikeke, iha salaun administrasaun Vikeke, ohin.
Autoridade lokál Fatukero ne’e hatutan, iha estudu komparativu ne’ebé autoridade husi munisípiu seluk mai Vikeke haree feto barak iha potensiál sai lideransa.
“Ha’u espera katak esperensia sira-ne’ebé ami fahe ba ami-nia maluk feto sira iha Vikeke tinan hitu mai, bele hahoris xefe suku feto rua ka tolu iha Vikeke. Ami husu maluk feto potensiál sira iha Vikeke nafatin esforsu an, labele dezanima avanasa ba oin, futuru xefe suku feto iha Vikeke mós iha,” nia dehan.
Nia dehan, feto nafatin hatudu kualidade tanba dala barak ne’e inan feto sira subar sira-nia kualidade tanba ne’e mak iha Vikeke xefe suku feto laiha periodu ida-ne’e.
“Ita-nia inan feton sira iha Vikeke potensiál barak maibé sira lakohi hatudu sira-nia an. Entaun, ami-nia vizita mai Vikeke ne’e, ami fahe ami-nia esperiénsia ba maluk feto sira, atu feto sira labele hasubar sira-nia kualidade. Feto nia servisu povu haree feto mak di’ak-liu mane sira. Tanba ne’e, ha’u husu feto potensiál sira labele dezanima tán,” nia dehan.
Iha estudu komparativu ne’e, organiza husi Sekretária Estadu Igualidade mo Inkluzivu (SEII) hamutuk ho xefe suku feto na’in-tolu husi munnisípiu tolu hanesan xefe suku Grisenfor Munisípiu Dili, xefe suku Aitias husi Munisípiu Manatotu no xefe suku Fatukero, Munisípiu Ermera.
Husi estudu komparativu ne’e, SEII no xefe suku feto sira oferese mós formasaun ba feto potensiál sira husi Munisípiu Vikeke hamutuk na’in-25. Matéria ba formasaun ne’e kompostu husi hasa’e partisipasaun feto iha vida polítika, enkuadramentu legál, lideransa transformativu, prevensaun violénsia bazeia ba jéneru no public speaking.
Iha fatin hanesan, feto potensiál munisípiu Vikeke, atuál xefe aldeia Tali-Oan, suku Uma Tolu, Lorença Sarmento, hato’o agradesementu ba SEI tanba bele organiza atividade estudu komparativu hodi lori xefe suku feto husi munisípiu seluk hodi mai fahe sira-nia esperiénsia ba feto potensiál sira iha munisípiu Vikeke.
“Iha estudu komparativu ne’e ami aprende matéria barak no matéria sira-ne’e bele hasa’e ona ami-nia koñesementu hodi haforsa no hakbiit ami feto iha munisípiu Vikeke, atu ami partisipa feto iha vida polítika. Liuhusi atividade ida-ne’e, ami bele prepara an di’ak hodi hein eleisaun sira hanesan eleisaun munisipál no eleisaun suku ne’ebé sei akontese iha tinan 2030. Ami feto potensiál sei konkorre ba xefe suku,” nia dehan.
Nia hateten, formasaun liderasa sira-ne’e eleisaun suku mai feto potensiál sira iha munisípiu Vikeke sei kandidata an ba xefe suku no suku 38 ne’e feto na’in-lima (5) hanesan ne’e sei lidera suku.
Jornalista : Vitorino Lopes da Costa
Editór : Cancio Ximenes
