DILI, 16 Setembru 2025 (TATOLI) – Delegasaun Uniaun Europeia na’in-39 hasoru malu ho Kámara Komérsiu no Indústria Timor-Leste (CCI-TL) hodi ko’alia kona-ba importasaun no esportasaun produtu Timor-Leste nian.
“Uniaun Europeia kompromete atu tulun Timor-Leste nia prosesu dezenvolvimentu ekonómiku, tanba Uniaun Europeia iha obrigasaun no kompromete atu fó asisténsia ba nasaun ida ne’ebé iha hela prosesu dezenvolvimentu, hanesan Timor-Leste”, Prezidente Delegasaun ba Asembleia Parlamentár Konjunta Uniaun Europeia (OACPS-UE), Francisco Assis, hateten ba jornalista iha CCI-TL.
Nia hatutan Timor-Leste nu’udar nasaun joven ida, maibé iha prosesu ne’ebé kompleksu tebes, tanba halo ona esforsu boot no transforma no moderniza ona ninia dezenvolvimentu.
“Iha tinan hirak ikus ne’e, Uniaun Europeia fó ona asisténsia maka’as, tantu diretamente no liuhusi nia nasaun membru sira, ba mundu iha dezenvolvimentu. No asisténsia ne’e sai importante liután”, nia hateten.
Francisco Assis reforsa katak sira-nia prezensa iha Timor-Leste ho delegasaun ba asuntu ne’ebé la hanesan, maibé atu buka hatene kona-ba dezenvolvimentu ekonomia Timor-Leste nian.
Vise-Prezidente Kámara Komérsiu Timor-Leste (CCI-TL), Hergui Luina Fernandes Alves, agradese tanba hetan vizita husi delegasaun Uniaun Europeia, ne’ebé hakarak hatene kona-ba situasaun no problema ekonómiku nasaun nian no saida maka UE bele halo hodi ajuda setór privadu no ekonómiku iha Timor-Leste.
“Ohin ami iha enkontru ida ho delegasaun hodi aprezenta situasaun reál husi setór privadu no ekonómiku sira iha Timor-Leste, nomós hodi esplora saida maka bele sai hanesan oportunidade ida hodi rezolve problema sira, atu estabelese parseria ida entre UE no Timor-Leste hodi fó solusaun ba dezafiu sira ne’ebé iha”, dehan.
Problema ne’ebé CCI-TL hasoru maka sertifikasaun ba produtu esportasaun. “Ami-nia pedidu prinsipál mak sertifikasaun, tanba laiha lisensiamentu padraun ka sertifikasaun ba produtu sira, ne’ebé limita ami-nia esportasaun sira. Ami-nia pedidu maka estabelese parseria ida ho UE hodi verifika padraun sira ne’ebé Uniaun Europeia iha”, konklui.
Jornalista: Arminda Fonseca
Editora: Maria Auxiliadora
