DILI, 29 Setembru 2025 (TATOLI)–Prezidente Repúblika, José Ramos-Horta, deklara iha tempu besik nia parte sei entrega uma Galeria Memória Viva ne’ebé nia simu husi Governu bainhira termina nia mandatu primeiru nu’udar Prezidente Repúblika 2007-2015, ba Governu Konstitusionál da-sia (IX) atu jere.
“Bainhira ha’u ramata ha’u-nia mandatu primeiru hanesan Prezidente Repúblika, tanba lei ida uluk sei eziste entaun Governu entrega uma ida mai ha’u iha Faról, agora Galeria Memória Viva ne’e, ha’u uza ha’u-nia osan dezenvolve fatin ne’e ho kultura Timor nian, maibé ba oin tenke entrega fali ba instituisaun balun hodi jere fali,” Prezidente Ramos-Horta hateten ba jornalista sira iha Palásiu Prezidensiál Nicolau Lobato, Bairru Pite, segunda ne’e.
Nia dehan, nia parte sei haree hela atu entrega ba Sekretáriu Estadu Arte no Kultura ka Autoridade Munisípiu Dili hodi halo jestaun.
“Ha’u haree hela, dalaruma entrega ba Sekretáriu Estadu Arte Kultura ou la’e Munisípiu Dili atu halo jestaun. Ha’u sei entrega uma no ha’u-nia obra sira iha ne’ebá ne’e entrega hotu,” Horta hateten.
Galeria Memória Viva Ramos-Horta dezenvolve sai hanesan fatin ne’ebé hodi prezerva materiál kultura Timor-Leste nian, halo salaun ne’ebé loke ba ema hotu bele hala’o atividade konferénsia nasionál no internasionál.
Nia dehan, fatin ne’e mós dezenvolve ho nia jardín ne’ebé nakonu ho ai-funan, ai-horis oioin no infeita mós ho livru rezisténsia nian balun.
Jornalista : Hortencio Sanchez
Editór : Cancio Ximenes
