Universidade do Minho Portugál sei atribui Doutoramentu Honoris Causa ba Ramos-Horta

DILI, 01 Outubru 2025 (TATOLI)–Universidade do Minho Portugál sei atribui Doutoramentu Honoraris Causa ba Preziente Ramos-Horta liuhusi serimónia ne’ebé prezide husi Profesór Luís Aguiar Conraria, tanba rekoñese Prezidente Ramos-Horta nia kareira distintu no ninia kontribuisaun esepsionál sira ba pás, demokrasia no dezenvolvimentu Timor-Leste nian.

Tuir planu, Prezidente Portugál, Marcelo Rebelo de Sousa, sei marka prezensa iha serimónia atribuisaun ne’e, no Prezidente Repúblika, José Ramos-Horta sei dezloka no hala’o vizita privadu ba Portugál iha 03 to’o 07 Outubru 2025.

“Onra ida-ne’e husi Universidade do Minho la’ós de’it distinsaun pesoál ida, maibé rekoñesementu ida ba reziliénsia povu timoroan nian no lasu kle’an, ne’ebé labele kotu ne’ebé ita partilla ho Portugál. Husi ita-nia istória partillada to’o ita-nia futuru komún. Vizita ida-ne’e hanesan testemuña ida ba parseria ida-ne’ebé harii iha respeitu ba malu no kompromisu komún ba demokrasia no progresu umanu,” Ramos-Horta hateten liu husi nota ne’ebé Tatoli asesu, kuarta ne’e.

Alende ne’e, tuir ajenda ne’ebé iha, vizita ne’e sei hahú iha Lisboa, iha loron 06 fulan-Outubru, Prezidente Ramos-Horta prezide serimónia kondekorasaun Medalla Orden Timor-Leste nian iha kategoria Grau Kolar, Grau Medalla, Medalla Méritu, no Sertifikadu Rekoñesementu ba distintu eis-membru sira Asembleia Nasionál Portugál nian no individuál sira entre simpatizante da-uluk no dedikadu liu ba Timor-Leste nia luta independénsia.

Tuir Dekretu Prezidente Repúblika Nú. 90/2025, pesoál sira-ne’ebé simu kondekorasaun ho Grau Kolár Orden Timor-Leste nian mak hanesan:

1. Dr. José Miguel Nunes Anacoreta Correia, Eis Deputadu Partidu CDS/PP
2. Dr. Carlos Manuel Natividade da Costa Candal (falesidu iha loron 18 fulan Juñu tinan 2009), Fundadór no Eis Deputadu Partidu Sosialista (postumu)

Tuir Dekretu Prezidente Repúblika Nú. 117/2024, Prezidente kondekora Grau Medalla Orden Timor-Leste nian ba Paulo Ferraz (Jornalista).

Tuir Dekretu Prezidente Repúblika Nú. 100/2025, Prezidente kondekora Medalla Méritu no Sertifikadu Rekoñesimentu ba Tenente-Jenerál Carlos Manuel Mourato, eis-Komandante-Xefe Guarda Nasionál Republikana.

“Ita fó onra ba solidariedade ne’ebé boot husi distintu personalidade portugés sira-ne’e. Sira-nia advokasia dahuluk iha koredór sira demokrasia Portugál nian sai hanesan buat apoiu vitál ida ba ita-nia kauza, no rekoñesementu ida-ne’e sai nu’udar testemuña ida ba lasu sira-ne’ebé dura entre ita-nia nasaun sira,” nia hateten.

Hafoin serimónia atribui kondekorasaun iha loron 6-7 fulan-Outubru, Prezidente Ramos-Horta sei halo viajen ba sidade Braga.

Viajen referidu, Prezidente Ramos-Horta kobre kustu hotu pesoalmente. Prezidente sei sai husi Portugál iha loron 8 fulan-Outubru no sei to’o iha Timor-Leste iha loron 9 fulan-Outubru tinan 2025.

TATOLI