DILI, 16 Outubru 2025 (TATOLI)—Primeiru-Ministru (PM), Kay Rala Xanana Gusmão, Kinta ne’e hasoru malu ho Prezidente Repúblika (PR), José Ramos-Horta hodi relata desizaun no polítika ne’ebé Governu foti iha semana ikus ne’e.
“Ohin ha’u mai hasoru Prezidente Repúblika hodi relata kona-ba OJE 2026 ne’ebé hatama ona ba Parlamentu Nasionál iha loron 01 Outubru no iha loron 05-07 Novembru sei debate no votasaun iha jeneralidade, no iha loron 10-24 Novembru debate no votasaun iha espesialidade no votasaun globál, iha loron 25 Novembru sei haruka mai Prezidente Repúblika hodi promulga,” PM Xanana hateten iha Palásiu Prezidénsia, Bairru-Pité.
Nia dehan, antes tama debate OJE 2026, ohin Parlamentu Nasionál hamutuk ho Governu hahú semináriu Panorama Orsamentál iha Ministériu Finansa.
Aleinde ne’e, Xefe Governu mós informa kona-ba Timor-Leste nia preparasaun tama Asosiasaun Nasaun Sudeste Aziátiku (ASEAN), ida-ne’e la’ós fásil maibé buat hotu ne’ebé tenke prepara iha setór legál ninian prepara hotu ona.
Notísia relevante : Governu aprezenta ona Proposta Lei OJE 2026 ba Parlamentu Nasionál
PM akrsenta, durante reuniaun, nia parte informa mós ba PR katak horisheik Konsellu Ministru aprova rezolusaun ida kona-ba Sekretariadu Komunidade País Ko’alia Lian Portugés (CPLP, sigla portugés) iha Lisboa.
“Tanba foin daudaun ne’e reuniaun iha Ángola sira hotu husu dehan hatama ema iha Sekretariadu ne’e la’ós rai ida ka rua de’it, maibé kontempla rai hotu membru CPLP tenke tuir konkursu no tenke iha igualidade jéneru,” nia katak.
Nune’e mós, informa katak Parlamentu nia proposta Rezolusaun daruak ho objetivu atu ratifika akordu entre Timor-Leste no Repúblika ho Ángola kona-ba inzensaun vistu ba titulár ba pasaporte diplomátiku no serbisu nian.
“Ha’u informa mós kona-ba horisehik ami aprova akordu ida entre Timor-Leste no Laos kona-ba troka direitu utilizasaun rai no edifísiu husi misaun diplomata sira, katak sira fó rai ruma iha ne’ebá fó ba ita-nia Embaixada ka Konsuladu karik ita mós tenke fó iha ne’e,” nia tenik.
Jornalista : Arminda Fonseca
Editora : Julia Chatarina
