DILI, 09 Juñu 2026 (TATOLI)—Primeiru-Ministru, Kay Rala Xanana Gusmão hamutuk ho delegasaun sira presta omenajen ba erói sira iha monumentu erói no martír sira-nian iha Mauzoléu Ho Chi Minh, Prasa Ba Dinh, Hanoi Vietname, segunda (08/05) ne’e.
Presta omenajen no serimónia tau ai-funan ne’e nu’udar parte ida hodi hahú programa vizita ofisiál Primeiru-Ministru nian durante loron tolu iha Vietname, hahú husi loron 08 to’o 10 Juñu 2026.
Iha serimónia vizita monumentu martír no eró ne’e, akompañadu husi Ministru Siénsia no Teknolojia Vietname, Huynh Thanh Dat, fó respeitu bá memória líder históriku Vietname nian, Ho Chi Minh, no bá erói no mártir sira-ne’ebé sakrifika sira-nia moris hodi defende independénsia no liberdade nasaun nian.
Prasa ba Dinh iha signifikadu istóriku bo’ot bá povu Vietname tanba iha fatin ne’e mak Ho Chi Minh deklara independénsia Vietname nian iha loron 02 Setembru 1945.
Mauzoléu Ho Chi Minh, ne’ebé lokaliza iha Prasa Ba Dinh, sai hanesan símbolu importante ida bá istória no kultura Vietname nian.
Enkuantu fatin ne’e kontinua atrai vizitante barak atu fó omenajen no respeitu bá líder ne’ebé konsidera hanesan fundadór Vietname modernu.
Nune’e durante vizita ne’e, PM Xanana sei partisipa iha Fórum Futuru ASEAN 2026 no hato’o diskursu Estadu iha abertura eventu ne’ebé sei realiza iha kuarta (10/06).
Entretantu durante vizita ofisiál iha Vietname delegasaun sira-ne’ebé akompaña Primeiru-Ministru iha mak hanesan, Vise-Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay; Vise-Primeiru-Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino.
Ministru Negósiu Estranjeiru no Kooperasaun, Bendito dos Santos Freitas; Ministra Edukasaun, Dulce de Jesus Soares; Ministru Komérsiu no Indústria, Filipus Nino Pereira; Vise-Ministra Asuntu ASEAN, Milena Maria da Costa Rangel; Sekretáriu Estadu Komunikasaun Sosiál, Expedito Dias Ximenes; no Xefe Gabinete Primeiru-Ministru, Elizabeth Exposto.
TATOLI
