DILI, 22 Novembru 2025 (TATOLI)-Governu liuhusi reuniaun estraordinária Konsellu Ministru (KM), sábadu ne’e, delibera hodi fó poder tomak ba Ministru Petróleu no Rekursu Minerál (MPRM), Francisco da Costa Monteiro, atu hodi Governu nia naran, asina akordu kooperasaun ho Woodside Energy, Ltd. ba projetu TLNG (Timor-Leste Liquefied Natural Gas) no gazodotu no dezenvolvimentu kampu Greater Sunrise.
Akordu ida-ne’e aliña ho Governu nia esforsu estratéjiku sira atu valoriza rekursu naturál nasionál nian, tuir Planu Estratéjiku Dezenvolvimentu (PED) 2011-2030 nian.
“No hatudu pasu importante ida ba avaliasaun téknika, komersiál, no regulatória konjunta kona-ba futuru unidade LNG ida, iha territóriu Timor-Leste”, refere nota Governu ne’ebé Ajénsia Tatoli asesu, ohin.
Negosiasaun sira ne’ebé hala’o hosi MPRM ho Woodside Energy, ne’ebé na’in ba parte husi kampu Greater Sunrise nian.
“Kria ona kondisaun nesesária, hodi formaliza kooperasaun ida-ne’e, ne’ebé fó dalan hodi halo estudu kle’an ne’ebé esensiál ba dezenvolvimentu projetu ne’e”, refere nota.
Ho desizaun ida-ne’e, Governu avansa iha prosesu implementasaun ba vizaun ida ne’ebé buka atu reforsa industrializasaun enerjétika nasionál, promove diversifikasaun ekonómika, no garante katak benefísiu husi rekursu Greater Sunrise nian sei kontribui direta ba dezenvolvimentu nasionál.
Jornalista: Nelson de Sousa
Editór: Rafael Ximenes de A. Belo
