DILI, 07 Janeiru 2026 (TATOLI)—Governu liuhusi Ministériu Interiór (MI) sei halo promosaun diviza ba Ofisiál Superiór Polísia Nasionál Timor-Leste (PNTL) hamutuk na’in-40 resin.
Ministru Interiór, Francisco da Costa Guterres, hateten, produsaun ida-ne’e hahú husi postu Superintendente Asistente to’o Superintendente Xefe ne’ebé sei promove ba postu Komisáriu Asistente.
“Ami prepara hela depois mak hatama took mai iha Konsellu Ministru mak ita haree. Mas ita prepara ona, hein de’it mai briefing Primeiru Ministru para depois haree hodi halo aprovasaun iha ne’e para ami avansa. Sira la barak, ita bele konta karik sira la to’o 50,” Ministru Francisco hato’o ba Jornalista sira hafoin partisipa iha reuniaun Konsellu Ministru ordinária iha Palásiu Governu, Kuarta ne’e.
Notísia relevante : Governu planeia halo promosaun diviza ba ofisiál superiór PNTL
Komandu Jerál PNTL submete ona lista promosaun ba Gabinete Ministru Interiór.
“Promosaun ne’e sei akontese ba sira. Ita sei iha modalidade hanesan sira ne’ebé agora postu Superintendente Xefe sei promove ba Komisáriu Asisténte. Sei ba iha ne’ebá depois mak ita haree ha’u sei informa ba ita bo’ot sira.” Nia hatutan.
Daudaun hein de’it modalidade atubele hetan aprovasaun no bele hahú prosesu.
“Ministériu tutela mak sei halo proposta mai Konsellu Ministru nune’e hetan aprovasaun husi Primeiru-Ministru para depois hahú ona prosesu ne’e,” nia tenik.
Jornalista : Natalino Costa
Editora : Julia Chatarina
