DILI, 07 Janeiru 2026 (TATOLI)-Deputadu husi Partidu Kongresu Nasionál Rekonstrusaun Timorense (CNRT), Natalino dos Santos, eleitu ba Prezidente Komisaun A ne’ebé trata Asuntu Konstitusionál no Justisa iha Parlamentu Nasionál.
Natalino dos Santos antes ne’e hanesan membru Komisaun B ne’ebé trata Asuntu Negósiu Estranjeiru, Defeza no Seguransa.
Bankada CNRT propoin kandidatu ne’e hodi substitui atuál Prezidente Komisaun A, Patrocínio dos Reis Fernandes, tanba daudaun asume hela kargu Prezidente Bankada CNRT, nune’e labele halo dupla pozisaun.
Tanba ne’e, liuhusi eleisaun, deputadu membru Komisaun A fó votu unanimidade hodi eleje prezidente foun ne’e.
Deputadu Natalino hateten hetan konfiansa husi partidu, liuliu bankada hodi depozita konfiansa bele lidera Komisaun.
“No ohin hetan mós konfiansa husi deputadu sira iha komisaun espesializada, tantu bankada Governu no opozisaun ho votu unanimidade ba ha’u”, nia hateten hafoin ramata sorumutu iha sala Komisaun iha Parlamentu, ohin.
Prezidente eleitu ne’e sei fó kontinuasaun serbisu sira ne’ebé iha ona, tanba lejislatura daneen ne’e la’o ona tinan rua.
Tanba ne’e, iha loron 08 Janeiru, sei konvoka reuniaun Komisaun hodi diskute planu no atividade anuál ba tinan ne’e
Aliende ne’e, sei fó atensaun ba lei balun ne’ebé meza Parlamentu baixa ona ba Komisaun no sei haree Lei Sibernétika, tanba daudaun tempu dijitál no sai preokupasaun boot, Lei Orden Advogadu, revizaun ba Kódigu Penál no kestaun sira seluk, ne’ebé sei koordena ho Governu atu trata lejislasaun sira ne’e.
Jornalista: Nelson de Sousa
Editora: Maria Auxiliadora
