DILI, 05 Janeiru 2026 (TATOLI)-Deputada membru Komisaun F ne’ebé trata Asuntu Saúde, Igualdade Jéneru no Inkluzaun Sosiál iha Parlamentu Nasionál, Maria Teresa Gusmão, enkoraja feto maluk sira iha munisípiu hotu atu kontinua kapasita an hodi partisipa iha eleisaun kámara munisipál no asembleia munisipál.
Nia louva daudaun Prezidente Autoridade Munisípiu (PAM) Baukau no Ainaru ne’ebé oukupa husi feto.
Tuir fiskalizasaun Komisaun iha baze, orgullu ida-ne’e hatudu ona dalan katak, sira iha korajen, prinsípiu no brani atu foti desizaun no jere munisípiu, no ida-ne’e pasu ida katak feto bele.
Deputada ne’e dehan daudaun Governu halo preparativu maka’as ba implementasaun desentralizasaun administrativa no podér lokál ba munisípiu sira, nune’e ba sira ne’ebé prienxe ona kondisaun mínima sei hakat ba eleisaun kámara munisipál no asembleia munisipál iha tinan 2027.
“Tanba ne’e, buat primeiru liu mak feto tenke kapasita ita-nia an, lee, rona no akompaña barak, nune’e ita preparadu bainhira responsabilidade iha, ita prontu duni atu kompete hodi serbí, la’ós mane de’it”, nia hato’o.
Lembra katak, iha 29 Dezembru 2026, Governu sentrál liuhusi Ministériu Administrasaun Estatál (MAE) hamutuk ho Prezidente Autoridade Munisípiu sira halo reuniaun hodi aprezenta relatóriu prelimináriu avaliasaun kondisaun miníma munisípiu sira. Nune’e iha munisípiu lima mak hetan valór muito bom no hitu hetan bom.
Relatóriu ne’e sei aprezenta bá Konsellu Ministru mak sei pronúnsia munisípiu nia naran.
Notísia relevante: Deputada PD husu munisípiu oan sira serbisu hamutuk hodi simu podér lokál
Jornalista: Nelson de Sousa
Editora: Maria Auxiliadora
