DILI, 09 Janeiru 2026 (TATOLI)—Servisu Rejistu Notariadu iha Ministériu Justisa (MJ) hatama ona reseita millaun $4-resin ba kofre Estadu durante tinan 2025 nia laran.
“Reseita pasaporte totál hahú husi Janeiru to’o finde Dezembru 2025 ita konsege akumula ba kofre Estadu hamutuk millaun $4-resin,” Diretór Jerál Servisu Rejistu Notariadu, Agustino Gonçalves Viera, informa ba Jornalista sira iha ninia knaar fatin, Kolmera, Sesta ne’e.
Fonte reseita mai husi atendimentu pasaporte komún, diplomata, inklui serbisu.
“Pasaporte komún ne’e ema barak liu kompara ho tipu pasaporte rua seluk, hanesan pasaporte serbisu no pasaporte diplomata. Pasaporte komún ne’e ema loron-loron mai halo atendimentu ne’e mak kontribui reseita barak liu,” nia akresenta.
Notísia relevante : Liña internet monu afeta ba atendimentu ba pedidu emisaun pasaporte
Atendimentu pasaporte ne’e kontinua la’o tuir nia regra pagamentu, ne’ebé loron-ida selu $100, loron-tolu $75 no loron-14 ne’e selu $50.
“Durante ne’e Notariadu kontinua implementa ida-ne’e no ha’u hakarak dehan, atendimentu pasaporte laiha problema,” nia katak.
Notariadu rekolla reseita millaun $2,1 iha tinan ne’e liuhusi atendimentu no emisaun pasaporte.
Biban ne’e, Diretór Jerál promete katak parte Diresaun tinan ne’e sei aposta ba melloramentu iha atendimentu.
“Daudaun ne’e Notariadu ema la antrian hanesan uluk, maibé atendimentu ne’e bele liuhusi ajendamentu online ne’ebé ita estabelese. Kuandu iha pedidu emerjénsia husi komunidade. Husi pasiente ne’ebé moras no ema ho difisiénsia fízika ita halo pedidu hodi rezolve kedan, daudaun sé mak urus surat ho asuntu emerjénsia ami bele atende lalais,” nia katak.
Ajendamentu online funsiona hela
Ajendamentu online ho link https://ajendamentu.mj.gov.tl/ ne’ebé Governu estabelese iha tinan 2024 funsiona hela.
“Ajendamentu online ne’e la’o di’ak, as vezes rede internet mak mosu fallansu, ami rezolve kedas,” Diretór hato’o.
Nia konsidera, meiu ne’e bele ajuda públiku hodi mai trata dokumentu no nu’udar meiu ida ba melloramentu atendimentu.
“Iha ne’ebá ne’e regula ho sistema ita simu de’it 100-resin, mas kuandu komunidade balun presiza urjente hodi trata sira-nia dokumentu, entaun bele lori mai direta, ami despaixu no rezolve kedan, ne’ebé durante laiha problema”, nia tenik.
Jornalista : Natalino Costa
Editora : Julia Chatarina
