DILI, 12 Janeiru 2026 (TATOLI) – Autoridade Aduaneira (AA)/Alfándega Timor-Leste rekolla, iha 2025, reseita hamutuk millaun $120-resin, ne’ebé nia kontribuisaun prinsipál mai husi Portu Tíbar.
Komisáriu AA/Alfándega, Joanico Pinto, hateten reseita ne’ebé sira rekolla ne’e maihusi instalasaun hitu ne’ebé Alfándega estabelese mak husi pontu entrada Batugadé rekolla $2.543.941,43, Bayu Undan Offshore $37.111,10, Aeroportu Dili $1.479.796,98, Portu Tíbar $116.201.445,71, postu integradu Maliana Tunu-Bibi $11.512,18, Post Office (Edifísiu Korreiu) $12.642,54, no postu integradu Suai-Salele $563.858,52
“Sira ne’e hotu mak ita tau hamutuk to’o hetan $120.850.308,46. Alvu ne’ebé Ministériu Finansa fó ba ami iha 2025 tenke rekolla reseita millaun $119, maibé ami ultrapasa tiha alvu ne’ebé sira fó”, nia dehan.
Tuir nia, reseita ne’ebé rekolla ne’e la inklui postu atendimentu rua iha Rejiaun Administrativa Espesiál Oekusi Ambenu (RAEOA), hanesan postu integradu Fronteira Sakato, no Oesilu, tanba daudaun ne’e seidauk tama iha sistema Alfándega nasionál hodi atualiza.
Lembra katak Autoridade Aduaneira ka Alfándega Timor-Leste kontribui, iha 2024, reseita hamutuk millaun $100-resin ba kofre Estadu.
Notísia relevante: Alfándega arrekada reseita kuaze millaun $80 iha Janeiru-Setembru 2025
Jornalista: Arminda Fonseca
Editora: Maria Auxiliadora
