DILI, 23 Setembru 2025 (TATOLI)–Autoridade Aduaneira (AA)/Alfándega arrekada reseita $79. 749.248,26 ba Kofre Estadu durante fulan-Janeiru to’o Setembru tinan ne’e.
Komisáriu AA/Alfándega, Joanico Pinto informa, reseita sira ne’e rekolla husi fronteira Batugade $1.911.402,18, Bayu-Undan Offshore $394.10, Dili Airport $1.044.528,20, Dili/Tibar Port $76.434.883,94, Maliana-Tunibibi $5.978,79, Post Office $5.492,40, no Suai – Salele $346.568,65
“Reseita hirak ne’e kontribui barak liu mai husi Portu Tibar ho montante $76.434.883,94 kompara ho portu no fronteira sira seluk kontribui maibé reseita oituan. Fiar katak tinan ne’e hotu ami kontribui reseita ba Kofre Estadu ho montante ne’ebé boot kompara ho tinan hirak ba kotuk,” Komisáriu Alfándega relata ba Jornalista sira, iha auditóriu Ministériu Finansa, Aitarak-Laran, Tersa ne’e.
Notísia relevante : Alfándega no BNCTL introdús pagamentu eletróniku ba taxas aduaneira
Reseita ne’ebé rekolla kompostu husi produtu importasaun, enkuantu iha exportasaun rasik laiha pagamentu.
“Entaun, buat sira ne’e hotu kontribui husi ekipa ne’ebé serbisu la haree ba loron feriadu tanba sira mós fahe oráriu serbisu husi segunda to’o domingu hodi haree iha área fronteira, maski dalaruma sira iha difikuldade ba rekursu umanu,” nia akresenta.
AA/Alfándega daudaun ne’e iha funsionáriu 253, ativu iha 200 no 53 seluk ho kondisaun ladún di’ak ho idade avansadu, ne’ebé sira ne’e integra kedan hahú tinan 2002 to’o agora.
Reseita ne’ebé rekolla iha tinan 2020 hamutuk $65.360.442,05, iha tinan 2021 hamutuk $67.981.100,75, iha tinan 2022 hamutuk $100.719.834,67, iha tinan 2023 hamutuk $103.298.645,10, iha tinan 2024 hamutuk $108.883.635,80 no iha tinan 2025 hamutuk $79.749.248,26, ho totál hamutuk $525.992.906,63.
Jornalista : Alexandra da Costa
Editora : Julia Chatarina
