VIKEKE, 13 Marsu 2026 (TATOLI)—Vise-Ministru Administrasaun Estatál (MAE), Jacinto Rigoberto G. de Deus halo koordenasaun ho Autoridade Munisípiu Vikeke ba preparasaun vizita Primeiru-Ministru (PM), Kay Rala Xanana Gusmão ne’ebé sei vizita iha semana oin (18 Marsu).
“Kona-ba objetivu vizita PM ho ekipa ne’ebé daudaun vizita hela ba munisípiu sira-ne’e, sai hanesan vizita espesiál ida tanba liga ba programa prioridade Governu nian ba desentralizasaun no podér lokál. Tan ne’e, ha’u husu autoridade sira bainhira PM ho ekipa sira mai vizita, aprezenta progresu servisu,” Jacinto Rigoberto informa iha Vikeke, Sesta ne’e.
Governante ne’e dezafia Autoridade Munisípiu Vikeke atu halo preparasaun ba aprezentasaun liuliu ba ezekusaun servisu sira ho di’ak no atrativu, atubele gaña konfiansa husi Primeiru-Ministru.
Iha fatin hanesan, Prezidente Autoridade Munisípiu Vikeke, Francisco C.S. de G. Soares, hato’o agradese ba Vise-Ministru Estatál ho komitiva ne’ebé hakat ona mai iha Vikeke hodi fó asisténsia téknika liga ba preparasaun simu vizita PM ho komitiva iha Vikek.
“Ita Vikeke preparadu no prontu simu Primeiru-Ministru no prontu simu kualker desizaun sira,” nia tenik.
Entretantu, hafoin sorumutu koordenasaun ramata, Vise-Ministru akompañadu husi autoridade Munisípiu Vikeke kontinua observa direta kondisaun terrenu ne’ebé sei hetan vizita husi PM ho membru Governu sira hanesan projetu PDIM liuliu reabilitasaun merkadu Olobai no kolam haki’ak ikan iha Suku Loihunu, Postu Ossú.
Partisipa iha sorumutu ne’e kompostu husi Sekretáriu Munisipál, Diretór ho Xefe Departamentu Munisipál no Delegasaun Territoriál, Segundu Komandante PNTL Vikeke, Prezidente Konsellu Kombante Libertasaun Nasionál (CCLN-sigla portugeza), Prezidente Kámara Komériu Indústria Timor-Leste (CCITL-sigla portugeza) Munisípiu Vikeke, Administradór Postu Administrativu (APA) lima (5) no funsionáriu sira.
Jornalista: Vitorino Lopes da Costa
Editór: Xisto Freitas da Piedade
