DILI, 18 Marsu 2026 (TATOLI)–Prevedór Direitu Umanu no Justisa (PDHJ), Virgílio da Silva Guterres ‘Lamukan’ prefere nomeasaun ba Komandante Jerál no Segundu Komandante Jerál foun Polísia Nasionál Timor-Leste (PNTL) tenke ema ne’ebé ho integridade no hatene istória instituisaun.
“Ba kualker nomeasaun líder ba Komisáriu ida atu lidera Polísia, ema ne’ebé tenke hatene istória polísia, liliu problema Polísia hahú husi tinan 2005 no 2006 tesik mai katak PNTL nia tama monu iha 2005 no 2006 depoizde krize. Entaun iha ema ida-ne’ebé mai restaura dignidade PNTL. Nia tenke hatene oinsá atu estabelese komunikasaun, haree rekursu sira iha Polísia no defende integridade Polísia. Ba ha’u ida-ne’e mak importante,” Prevedór Virgílio hato’o ba Ajénsia TATOLI iha Timor Plaza, Kuarta ne’e.
Notísia relevante : Superintendente Asistente Polísia Domingos Gama nomeadu hanesan Segundu Komandante PNTL Likisá
Nia dehan, Komisáriu foun PNTL ne’e tenke iha integridade, iha koñesimentu no iha kapasidade lideransa no jestaun ne’ebé di’ak.
“Tenke iha integridade ne’e mak importante no nia tenke hatene istória PNTL ne’ebé kle’an nune’e bele halo dezenvolvimentu ba instituisaun ho di’ak,” nia akresenta.
Iha fatin hanesan, Diretór Ezekutivu FONGTIL, Incencio Xavier, hateten, ema ne’ebé atu lidera instituisaun PNTL ne’e tenke iha integridade.
“Buat tolu ne’ebé mak ha’u hakarak hateten iha ne’e, iha esperiénsia impéritu ho PNTL ne’e rasik durante tempu naruk no terseiru karik iha nomeasaun polítika, ha’u-nia advice ba Konsellu Ministru ka Governu maka tenke haree ema ne’ebé iha integridade,” nia katak.
Nia dehan, tempu ona atu promove feto ba kargu Komandante Jerál.
“Tenke promove ona feto hodi ita halo buat ruma ne’ebé hatuur ba iguldade jéneru. Tanba daudaun ita iha Sekretaria Estadu Igualdade no Inkluzaun maibé Komandu durante nomeasaun ba kargu Komandante Jerál no segundu Komandante Jerál durante ne’e feto laiha,” nia fó hanoin.
Jornalista : Natalino Costa
Editora : Julia Chatarina
