DILI, 27 Abríl 2026 (TATOLI)- Polísia Nasionál Timor-Leste (PNTL), liuhusi Diresaun Servisu Investigasaun Kriminál (DSIK) hamutuk servisu intelenjénsia, segunda, tuku 20h40, kalan ne’e, detein sidadaun estranjeiru na’in- lima tanba suspeitu ba kazu atividade tranzasaun droga ho tipu sabu-sabu iha Dili laran.
Sidadaun estrajeiru ne’ebé suspeita ba kazu troga ne’e kompostu husi sidadaun Indonézia na’in-haat no Xineza na’in-ida.
Hafoin hetan informasaun no deteta, ekipa konjunta bá kedan área hanesan Kampung Merdeka, Merkadu Antigu (Merkadu Lama) no Bidau, ne’ebé durante ne’e konsidera hanesan pontu sensitivu ba movimentu tranzasaun ilegál ba ai-moruk droga referida.
Liuhusi operasaun ne’e ekipa konjunta ne’ebé kompostu husi Servisu Investigasaun Kriminál no komunidade intelenjénsia detein suspeitu sira ne’e no mós konsege asegura karreta ida ne’ebé uza atu fasilita atividade kriminál ne’e.
Daudaun ne’e, Suspeitu sira asegura hela iha Diresaun Servisu Investigasaun Kriminál Komandu Jerál PNTL- Kaikoli hodi halo prosesu identifikasaun no investigasaun.
Entretatu ekipa konjunta kontinua halo operasaun atu kombate krime organizadu no proteje seguransa públiku, liuliu hasoru ameasa droga ne’ebé bele estraga futuru juventude no fó ameasa ba estabilidade nasaun.
Jornalista: Natalino Costa
Editór: Florencio Miranda Ximenes
