BOBONARU, 02 Jullu 2026 (TATOLI)-Autoridade Munisípiu Bobonaru (AMB) halo sosializasaun sirkulár kona-ba ijiene no orden públika ba negosiante sira, konsellu suku, Autoridade Postu Administrativu Maliana, munisípiu Bobonaru.
Sosializasaun ne’e bazeia ba Dekreitu-Lei númeru 34/2025, loron 15 Outubru, sesta alterasaun ba Dekretu-Lei númeru 3/2016, kona-ba Estatutu Autoridade no Grupo Tékniku Interministeriál ba Desentralizasaun. Tuir artigu 25, numeru 1, alínea a), Prezidente Autoridade Munisipál reprezenta Governu sentral.
Sirkulár ne’e estabelese regra sira atu organiza no garante orden públika, limpeza no utilizasaun adekuada ba fasilidade públika sira, hanesan estrada, kanál irrigasaun, mobiliariu urbanu, edifísiu públiku no espasu públiku seluk husi kapitál munisípiu to’o aldeia sira.
Regulamente ne’e mós bandu soe fo’er arbiru, fase kareta no motorizada iha kanál irrigasaun, fase transporte iha estrada ninin, husik animá livre iha sidade urbana, no fakar materiál konstrusaun iha estrada ne’ebé bele impede movimentasaun ema no transporte.
Prezidente Autoridade Munisípiu Bobonaru, Paulo Moniz Maia, dehan sosializasaun ne’e atu fahe informasaun, haburas koñesimentu no atu kria kompriensaun komunidade, hametin kooperasaun no garante katak regra sira ne’e bele komprende no implementa husi ema hotu.
Notísia relevante: Autoridade Bobonaru prepara sirkulár bandu fase karreta-motór iha espasu públiku
“Sirkulár ida-ne’e ita prepara kle’ur ona, besik tinan. Ohin ita sosializa atu habelar ba imi hotu iha Maliana, tanba dalaruma ita ko’alia ho ibun de’it la rona, entaun hamosu sirkulár ne’e hanesan regra ida, lei ida ki’ik liu atu regula no kontrola ema”, nia hateten iha atividade sensibilizasaun ne’ebé realiza iha salaun Maria Tapó.
Paulo Moniz hateten katak sirkulár ne’e sei implementa iha loron 15 Jullu 2026 ho objetivu atu regula utilizasaun espasu públiku, proteje propriedade Estadu no área protejida sira.
“Ita-nia área Atabae, Balibó no Maliana movimentu tranporte maka’as. Ita-nia dalan protokulu asidente mosu beibeik, tanba animál husik livre, karau no bibi barak. Ba oin sei la akontese, se akontese karau tama liu iha estrada tula hodi fó ba merenda eskolár no ema kbiit-la’ek sira”, nia dehan
Komadante Munisípiu Polísia Bobonaru, Superintendente Xefe Damião da Silva Correia, afirma katak autoridade seguransa prontu apoia ba implementasaun tanba konsidera sirkulár ne’e ajuda tebes serbisu PNTL nian ba prevensaun seguransa rodoviária, liuliu regra utilizasaun via públika.
Biban ne’e nia husu ba partisipante sira, liuliu membru konsellu suku atu hamutuk ho Ofisiál Polísia Suku (OPS) sira atu habelar informasaun ne’e ba komunidade, bainhira sirkulár ne’e implementa sira bele koopera ho ekipa task force.
“Ita halo ida-ne’e para komunidade iha koñesimentu, se la’e de repente ekipa ne’e to’o iha fatin, nia fahi ida kesi tinan lima foin mak sai, imi oho tiha ne’e problema”, katak.
Iha sorin seluk, Xefe Suku Ritabou, Maximiano dos Santos Araújo, konsidera sirkular ne’e bele ajuda komunidade moris iha ambiente moos hodi hafurak liután Bobonaru.
“Komunidade sira hela besik irrigasaun ne’e sira fornese fali bee fo’er ba kanu laran, depois tun ba ne’e fo’er, popok oan nia, inan-nia mós bee lori tun ba hotu, iha kraik ne’e simu to’o labele. Ida-ne’e ladún di’ak ba ita-nia sidade”, nia dehan.
Sirkular ne’e iha artigu 12 no multa ne’ebé sei aplika hahú husi $5 to’o $1000, depende ba irregularidade ne’ebé infratór sira komete.
Notísia relevante: Komunidade solisita Autoridade Bobonaru halo operasaun ba asu husik livre
Jornalista: Sergio da Cruz
Editora: Maria Auxiliadora
